ყოფილი პრემიერმინისტრისა და პარტია საქართველოსთვის ლიდერის, გიორგი გახარიას განცხადებით, ნამახვანჰესის კონტრაქტის დადების დროს შინაგან საქმეთა სამინისტროში იყო და "არც ახსოვს" ეკონომიკურ ნაწილში ისე გაიარა კონტრაქტმა. მისი თქმით, ეს მისი "ბრალი და პასუხისმგებლობაა".

"მე მაგალითად, შემიძლია გითხრათ, რომ ნამახვანის კონტრაქტი რომ შეადაროთ სხვა, მსხვილი ჰესების კონტრაქტებს, ზოგთან შედარებით ბევრად უკეთესია. ფაქტია ეს, მე ახალს კი არაფერს არ ვამბობ. ეს კარგია თუ ცუდია, მაშინ უნდა გადაგვეწყვიტა, როდესაც ეს გადაწყვეტილება მიიღო 2019 წლის აპრილში და ეს კონტრაქტი იყო გაფორმებული.

სამწუხაროდ, მაშინ მე საერთოდ შინაგან საქმეთა სამინისტროში ვიყავი და ეკონომიკურ ნაწილში აი, არც მახსოვს — ჩემი ბრალია, ჩემი პასუხისმგებლობაა — არც მახსოვს ამ კონტრაქტმა როგორ გაიარა. უბრალოდ, ეს კონტრაქტი თქვენ რომ აიღოთ და შეადაროთ სხვა მსხვილი ჰესების კონტრაქტს, ეს არ ნიშნავს და არ არის გარანტი, რომ ეს კარგია ან ცუდია", — თქვა მან.

გახარიას განცხადებით, ამ პროცესებში მთავარი პრობლემა ნამახვანჰესის მოწინააღმდეგეებთან კომუნიკაციაა და თუ ეს არ მოგვარდება, "პრობლემა იქნება".

დღეს, 31 მაისს გახარია ჟურნალისტების კითხვებს საჯაროდ პასუხობს. მან 29 მაისს პარტიისა და გუნდის პრეზენტაცია გამართა. პარტიას საქართველოსთვის ჰქვია. 18 თებერვალს ის პრემიერმინისტრობის თანამდებობიდან გადადგა. ამის შესახებ მან სპეციალურ ბრიფინგზე განაცხადა და ეს გადაწყვეტილება ნიკა მელიას საქმეს დაუკავშირა. მან ახსენა ისიც, რომ გუნდში ამაზე აზრთა სხვადასხვაობა იყო.

22 მარტს გახარია საზოგადოებასთან თანამდებობის დატოვების შემდეგ პირველად გამოჩნდა და თქვა, რომ "არსად წასვლას არ აპირებს, მეტიც, არც პოლიტიკიდან" მიდის. 14 აპრილს კი გახარიას გუნდის ახალმა წევრმა, გიორგი ხოჯევანიშილმა განაცხადა, რომ ისინი მომდევნო არჩევნებისთვის მზადებას დაიწყებენ და შესაბამისად, მონაწილეობასაც მიიღებენ.

ამ ეტაპზე გახარიას გუნდში ქართული ოცნების 6 ყოფილი დეპუტატია. მმართველი პარტიიდან წავიდნენ და ყოფილ პრემიერმინისტრს უერთდებიან: გიორგი ხოჯევანიშვილი, მიხეილ დაუშვილი, ანა ბუჩუკური, ალექსანდრე მოწერელია, ბექა ლილუაშვილი და შალვა კერესელიძე.

გარდა ამისა, გახარიას პოლიტიკურ პარტიას უერთდებიან NATO-ში საქართველოს ყოფილი ელჩი, ლევან დოლიძე და ყოფილი პრეზიდენტის, გიორგი მარგველაშვილის ადმინისტრაციის ხელმძღვანელი, გიორგი აბაშიშვილი.