"თქვენთვის არავის არ უსვრია, დამიზნებით გესროლეს?", — ასე უპასუხა ყოფილმა პრემიერმინისტრმა, გიორგი გახარიამ მთავარი არხის ჟურნალისტს თამარ ბაღაშვილს კითხვაზე, თუ რატომ ესროლეს მას ტყვია 20 ივნისის ღამეს.

კითხვაზე გაიმეორებდა თუ არა იმავე ვითარებაში იმას, რაც 20 ივნისს მოხდა, გახარიამ უპასუხა, რომ მისი მოვალეობა სახელმწიფო ინსტიტუტების დაცვაა.

"ნებისმიერ დროს და განსაკუთრებით მე მაშინ ვიყავი შინაგან საქმეთა მინისტრი, ჩემი პირდაპირი მოვალეობა იყო სახელმწიფო ინსტიტუტის დაცვა, ნებისმიერ დროს საქართველოში ფიზიკური ძალადობით პოლიტიკური ხელისუფლების შეცვლის წინააღმდეგი ვიყავი და ვიქნები. უაღრესად სამწუხაროა, ტრაგიკულია, როდესაც მსგავს შემთხვევებს ადამიანების დაზიანება მოჰყვება. რა თქმა უნდა, სამწუხაროა. რა თქმა უნდა, მაკო გომური ეს არის ტრაგედია. გეთანხმებით ამაში, მაგრამ მე წარმომიდგენია და მინდა გთხოვოთ თქვენც წარმოიდგინოთ რა მოხდებოდა მაშინ, როდესაც ეს მოძალადე რაზმები, რომლებიც ჩვენმა მოსახლეობამ ტელევიზიით ნახა, შეჭრილიყვნენ პარლამენტში", — განაცხადა გახარიამ.

გიორგი გახარიამ, ასევე, განაცხადა, რომ 20 ივნისის ღამეს დაშავებულები უპასუხისმგებლო პოლიტიკოსების უპასუხისმგებლო ქმედების მსხვერპლი არიან, ისევე, როგორც ეს შეიძლება ცალკეული პოლიციელების გადაცდომის ან გადამეტების ნაწილი ყოფილიყო.

20 ივნისს საქართველოს პარლამენტში რუსი დეპუტატის, სერგეი გავრილოვის მიერ თავმჯდომარის სკამის დაკავებას საპროტესტო ტალღა მოჰყვა. მოქალაქეები და ოპოზიციის წევრები ითხოვდნენ პარლამენტის თავმჯდომარის, სუს-ის ხელმძღვანელის და შს მინისტრის გადადგომას. მშვიდობიანი პროტესტი მოგვიანებით დაპირისპირებაში გადაიზარდა და ცენტრალურ გამზირზე მობილიზებულმა სპეცრაზმმა აქციის დაშლა დაიწყო. სამართალდამცავებმა მოქალაქეების წინააღმდეგ რეზინის ტყვიები, ცრემლსადენი გაზი და წყლის ჭავლი გამოიყენეს. აქციის დაშლის დროს კლინიკებში 240 მოქალაქე გადაიყვანეს, რომელთაგან 80 სამართალდამცავი იყო. დაშავებულებიდან 2-მა თვალი დაკარგა, მათ შორის 18 წლის გოგომ. საგამოძიებო უწყებამ დაზარალებულად 67 სამართალდამცავი და 4 მოქალაქე ცნო. ამავე საქმეზე ბრალი წაუყენეს 3 სამართალდამცავსა და 17 მოქალაქეს.