ქართული ოცნების დეპუტატი, დავით კაჭარავა ამბობს, რომ არ იცის არის თუ არა ალექსანდრ დუგინი კრემლის მთვარი იდეოლოგი, მაგრამ იცნობს ლევან ვასაძეს და პატივს სცემს მას. ასე უპასუხა მან კითხვას, რამდენად მისაღებია ქართველი პოლიტიკოსის შეხვედრა დუგინთან.

"საერთოდ არ ვიცი დუგინი თუ არის კრემლის მთავარი იდეოლოგი, მაგრამ ვასაძეს ბევრი კონტაქტები აქვს რუსეთში და მას უნდა ჰკითხოთ ალბათ რა სახის შეხვედრა იყო და რაზე შეხვდნენ. [...]

ლევანი არის გამოცდილი ადამიანი, ცხოვრებაში ბევრი რამ გაუვლია, წარმატებული ბიზნესმენია. მას პირადადად ვიცნობ, ჩვენ არ გვისაუბრია პოლიტიკურ შეხედულებებზე, ასე, რომ როგორც ადამიანს, ვაფასებ და პატივს ვცემ. დანარჩენი პოლიტიკური შეხედულებები არ ვიცი მისი", — განუცხადა მან მთავარ არხს.

გუშინ, 26 მაისს ტელეკომპანიამ გაავრცელა ინფორმაცია, რომ დამოუკიდებლობის დღეს ლევან ვასაძე ალექსანდრ დუგინს მოსკოვში შეხვდა. ვასაძეს ეს ინფორმაცია არ უარუყვია. პრორუსული Alt-info-ს ინფორმაციით, ვასაძე მათ ეთერში ისაუბრებს, რაზე ესაუბრა დუგინს.