ნაციონალური მოძრაობის თავმდჯომარის, ნიკა მელიას განცხადებით, მან ირაკლი ღარიბაშვილს ხელი შეუწყო, რომ პრემიერმინისტრად მოსულიყო და თავადვე შეუწყობს ხელს, რომ "აღარ იყოს".

"ბატონი ღარიბაშვილი 24 საათი რომ საუბრობს ნაციონალურ მოძრაობაზე და ჩემზე, აქაც ხომ ჩანს, რომ მშვიდი ძილის შესაძლებლობა მას არ აქვს. მეორე, ბატონი ღარიბაშვილის ადგილზე, მე მადლობას გადავუხდიდი ნაციონალური მოძრაობის თავმჯდომარეს — რომ არა მე და რომ არა ის უსამართლობისადმი თავის არდახრა, დღეს პრემიერმინისტრი იქნებოდა ბატონი გახარია და ბატონი ღარიბაშვილი იქნებოდა ისევ იქ, სადაც იყო, არ ვიცი. ამიტომ ბატონ ღარიბაშვილს მართებს, მადლობა გადამიხადოს, რომ ის არის დღეს პრემიერმინისტრი", — თქვა მან.

18 თებერვალს გიორგი გახარია პრემიერმინისტრობის თანამდებობიდან გადადგა. ამის შესახებ მან სპეციალურ ბრიფინგზე განაცხადა და ეს გადაწყვეტილება ნიკა მელიას საქმეს დაუკავშირა. მან ახსენა ისიც, რომ გუნდში ამაზე აზრთა სხვადასხვაობა იყო. იმავე დღეს ქართულმა ოცნებამ პრემიერმინისტრობის კანდიდატად ირაკლი ღარიბაშვილი დაასახელა, ხოლო უკვე 22 თებერვალს ქართულმა ოცნებამ ღარიბაშვილის მთავრობას ნდობა გამოუცხადა.