ისრაელის საზღვრიდან საქართველოს კიდევ 30 მოქალაქე წუხელ დააბრუნეს. საქართველოს ამდენივე მოქალაქეს უთხრეს უარი ისრაელში შესვლაზე მიმდინარე წლის იანვარშიც. რუსთავი 2-ის ინფორმაციით, დაბრუნებული მოქალაქეებისთვის დეპორტაციის მიზეზი არ განუმარტავთ.

ტელეკომპანია მგზავრებზე დაყრდნობით იუწყება, რომ საქართველოს 30 მოქალაქე ისრაელში ჩაფრენისთანავე გადაიყვანეს სადეპორტაციო ციხეში და სამი დღის განმავლობაში, გაუსაძლის პირობებში იმყოფებოდნენ. გამოძევებულთა შორის არიან როგორც კაცები, ისე - ქალები.

დეპორტირებულები ისრაელის საელჩოსთან ხვალ აქციის გამართვას გეგმავენ. On.ge საქართველოს საგარეო საქმეთა სამინისტროსგან კითხვებზე პასუხს ელოდება, რომელსაც მოგვიანებით შემოგთავაზებთ.

სხვადასხვა ქვეყნის მოქალაქეთა ქვეყანაში არშეშვებაზე საუბრობს ისრაელის მედიაც. მედიასაშუალება Haaretz 5 თებერვლის სტატიაში წერს, რომ მას შემდეგ, რაც ისრაელმა საქართველოს, უკრაინისა და რუსეთის მოქალაქეებისთვის უვიზო მიმოსვლა დააწესა, გაიზარდა იმ ქალთა რაოდენობა, რომლებიც ისრაელში ამ ქვეყნებიდან სწორედ სექსტრეფიკინგისთვის ჩადიან. მედიასაშუალების ცნობით, ტრეფიკიორებს ქალები ჩაჰყავთ ისრაელში, ათავსებენ სასტუმროებში, რთავენ უკანონო სექსინდუსტრიაში, სამთვიანი ტურისტული ვადის გასვლის მერე კი ქვეყანას ატოვებინებენ, რათა მათ საბუთებს პრობლემა არ შეექმნათ.

Haaretz იშველიებს ისრაელის სასაზღვრო პოლიციის მონაცემებს, რომლის მიხედვითაც, 2016 წელს ქვეყანაში შესვლაზე 300 ქალს უთხრეს უარი, თუმცა არ არის დაკონკრეტებული, კონკრეტულად საქართველოს მოქალაქე რამდენი იყო. 2015 წელს ეს რიცხვი 50-მდე იყო.
ისრაელის საგარეო საქმეთა სამინისტროს წარმომადგენელმა Haaretz-ს განუცხადა, რომ ისინი შეშფოთებით ადევნებენ თვალს უვიზო მიმოსვლით გამოწვეულ ტენდენციას და პრობლემასთან გასამკლავებლად საკითხს იუსტიციის სამინისტროსთან ერთად სწავლობენ.