პრემიერმინისტრი, ირაკლი ღარიბაშვილი ფიქრობს, რომ ნაციონალური მოძრაობის თავმჯდომარე და პარტიის სხვა წევრები "ძალიან წვალობენ", რადგან პარლამენტში შესვლა სურთ, მაგრამ რცხვენიათ. მისი თქმით, თუ მელიას მართლა არ უნდა პარლამენტში შესვლა, უნდა გამოიჩინოს პრინციპულობა და არ შევიდეს.

"ჩვენ ვნახეთ რეალურად რაც ხდება, გარედან ჩანს და შიგნიდანაც ვიცით, როგორც ხდება. ძალიან წვალობენ, მელია და სხვებიც, ძალიან უნდათ პარლამენტში შესვლა, მაგრამ რცხვენიათ, შეიძლება ასე ითქვას. მძიმე მდგომარეობაში არიან. მესმის პირადად მისიც, იმიტომ, რომ ადამიანი, რომელმაც იკადრა უკადრებელი, თავისი ჭკუით სახელმწიფო დააყენა გამოწვევის წინაშე, თქვა, რომ არც გადაიხდიდა გირაოს და ვერც დაიჭერდნენ. დავიჭირეთ კიდევაც და გირაოც ძალიან კარგად გადაიხადეს, მიიღო კიდევაც გირაო.

ახლა ამბობს, ბაქიბუქობდა ტყუილად, რომ პარლამენტში არ შევიდოდა, მაგრამ ძალიან კარგად ვიცით შიგნიდან, რომ მას ძალიან უნდა პარლამენტში შესვლა. თუ არ უნდა შესვლა, მაშინ არ შევიდეს, დაამტკიცოს როგორი პრინციპული ადამიანია, მანაც და ნაცმოძრაობის სხვა ლიდერებმაც", — განაცხადა მან.

ღარიბაშვილმა აღნიშნა ისიც, რომ "ამ გაუგებარ ადამიანებზე დროს ვერ დაკარგავენ" და მოსახლეობა დაიღალა "მათი მუდმივი, გაუთავებელი საბოტაჟით და დესტაბილიზაციის მცდელობით".