"მე პირადად ვისურვებდი მომავალში, რომ თქვენ ნაცებმა ხომ დაიხსენით სააკაშვილის ტყვეობისგან თავი, იქნებ რომან გოცირიძეც დაიხსნათ, იმიტომ, რომ სჭირდება ის, აკადემიური კაცია", — განაცხადა პლენარულ სხდომაზე ქართული ოცნების დეპუტატმა, ირაკლი ზარქუამ. მისი თქმით, გოცირიძე გამოადგება ოპოზიციას, რადგან ეკონომიკური საკითხები კარგად ესმის, განსაკუთრებით დღგ-სა და აქციზის საკითხები.

"მინდა შევახსენო ძვირფას ოპოზიციას, რომ დღგ-ს ნაწილში ბიუჯეტში გვაქვს 4 მილიარდ 300 მილიონი, აქციზის ნაწილში გვაქვს მილიარდ-ნახევარი. ჯამში არის 5 მილიარდზე მეტი. ჩვენ 20-21 წლის ბიუჯეტში სოციალური უზრუნველყოფა და ჯანდაცვა ჯამში გვაქვს 5 მილიარდზე მეტი.

ასე, რომ ჩვენ რომ გვაქვს ეს აქციზი და ეს დღგ სწორედ ამით არის, რომ ბევრ პრობლემებს ვუგვარებთ ჩვენს მოსახლეობას. რაც შეეხება საგადასახადო კუთხით, მე არ ვიცი არიან ოპოზიციაში კვალიფიციური ადამიანები, ვინც გეტყვიან და დაგიდასტურებენ, რომ საქართველო მსოფლიოში ერთ-ერთი მოწინავეა ყველაზე მსუბუქი საგადასახადო კუთხით, სამეულში ვართ. [...]

მე პირადად ვისურვებდი მომავალში, რომ თქვენ ნაცებმა ხომ დაიხსენით სააკაშვილის ტყვეობისგან თავი, მათ შორის, იქნებ რომან გოცირიძეც დაიხსნათ, იმიტომ, რომ სჭირდება ის, აკადემიური კაცია, იცის. ბოლოს ამ პოლიტიკური იმის გამო არასწორ რელსებზე გავიდა, მაგრამ თუმცა მას ესმის საგანი და დარწმუნებული ვარ, რომ გაგაძლიერებთ ამ მიმართულებით", — განაცხადა მან.

ეს პირველი შემთხვევა არ არის, როდესაც ქართული ოცნების დეპუტატი პარლამენტში რომან გოცირიძის შესვლის სურვილს გამოთქვამს. მანამდე მიხეილ ყაველაშვილმა განაცხადა, რომ გოცირიძეს პარლამენტში ელის და მას პატივსაც სცემს.