ევროპული საქართველოს ლიდერის, გიგა ბოკერიას განცხადებით, კომპრომისის ფასი სწორედ 20 ივნისის ამნისტიაზე შეთანხმებაში მდგომარეობს.

"თუ მოხდა შეთანხმება, კომპრომისის არსი იქნება ის, რომ 20 ივნისს მომხდარ დანაშაულებთან დაკავშირებით იმ მუხლებით, რა მუხლებზეც მოხდება შეთანხმება, თქვეს, რომ ამნისტია კონკრეტულ მუხლებს უნდა შეეხოს, იქ აღარ ექნება მნიშვნელობა პოლიტიკურად ვინ ვის იყო და ვინ ვის მხარეს წარმოადგენდა, ეგ არის კომპრომისის ფასი, ნამდვილად ასეა. ოღონდ რა მუხლები შევა, ან არ შევა ამნისტიაში, არის მძიმე მუხლები ხომ ასევე? აქამდე არ მისულა დისკუსია ჯერ. თუ გულისხმობთ იმას, რაც ბევრი კარგი ადამიანისთვის, მოქალაქისთვის არ იყო მისაღები და მე მესმის რატომ არ იყო მისაღები, დიახ, კომპრომისის ფასი მდგომარეობს სწორედ მაგაში, რომ ასეთ რაღაცაზე ვთანხმდებით", — ამბობს ბოკერია.

ქართულ ოცნებასა და ოპოზიციას ევროკავშირის წარმომადგენლობაში გამართულ შეხვედრაზე ახალი დოკუმენტი შესთავაზეს, თუმცა მმართველი პარტია ადგილზე არ იმყოფებოდა. მხარეებს მოსაფიქრებლად დრო მიეცათ.

დოკუმენტში საუბარია პოლიტპატიმრებზეც. კერძოდ, საუბარია იმაზე, რომ დოკუმენტის ხელმოწერიდან 1 კვირის განმავლობაში ორ შემთხვევაში, იგულისხმება ნიკა მელიასა და გიორგი რურუას საქმეები, იქნება ამნისტია ან სვხა ნაბიჯი, რომელსაც ანალოგიური შედეგი ექნება. საუბარია ამნისტიის კანონზეც, რომელიც 2019 წლის 20 ივნისის აქციებს ეხება. პარტიები ცვლილებების მხარდასაჭერად პარლამენტში უნდა შევიდნენ.

გარდა ამისა, დოკუმენტში საუბარია საარჩევნო რეფორმაზე, სადაც გაზიარებულია ვადამდელ არჩევნებთან დაკავშირებით ქართული ოცნების წინადადებაა, თუმცა ნაცვლად 40%-სა, შემოთავაზებულია 43%. კერძოდ, ვადამდელი არჩევნები ჩატარდება 2022 წელს, თუ 2021 წლის თვითმმართველობის არჩევნებში მმართველი პარტია 43%-ზე ნაკლებ პროპორციულ ხმას აიღებს.

დოკუმენტი მოიცავს სასამართლო რეფორმას, პარლამენტში ძალაუფლების გადანაწილებასა და მომავალ არჩევნებსაც.

ამავე თემაზე: