ერთგულება და სიმამაცე ჩვენი საყვარელი ოთხფეხა ცხოველებისგან ნამდვილად არ გვიკვირს, თუმცა წლინახევრის კლოვერის გმირობის ამბავი ნამდვილად გამორჩეულია. ინტერნეტსივრცე კლოვერის ვიდეომ მოიცვა, სადაც კლოვერმა საოცარი გონიერება გამოიჩინა და გულწასული პატრონი, ჰეილი მური გადაარჩინა.

სეირნობისას ჰეილი მურმა მოულოდნელად გონება დაკარგა. კლოვერი არ დაიბნა, საბელისგან თავი გაითავისუფლა და გზაზე მომავალ მანქანას გადაეღობა. მძღოლი მანქანიდან გადმოვიდა და გულწასული პატრონი იპოვა. შემთხვევა მეზობლის კამერამ დააფიქსირა.

CTV News-ის მიხედვით, კლოვერმა პატრონი მძღოლთან დატოვა და დახმარების სათხოვნელად ამჯერად სამეზობლოს მიაშურა. საბოლოოდ, ძაღლმა დასახმარებლად ჰეილი მურის კიდევ ერთი მეზობელი მოიხმო.

მეზობლის შემდეგ, კლოვერი სახლში დაბრუნდა და ამბავი პატრონის ოჯახის წევრებს "შეატყობინა". ჰეილის მამის თქმით, შინ დაბრუნებული კლოვერი გაუჩერებლად ყეფდა. ოჯახმა შვილის გულის წასვლის შესახებ მეზობლებისგან გაიგო. სანამ ოჯახი შემთხვევის ადგილას მივიდა, ჰეილის დახმარება სამედიცინო პერსონალმა აღმოუჩინა. კლოვერის პატრონი თავს უკვე კარგად გრძნობს.

"ასეთი რამ თუ კიდევ მოხდება, თავს ათმაგად უფრო დაცულად ვიგრძნობ, რადგან ვიცი, რომ ის აუცილებლად დამეხმარება. თქვენც კარგად იცით, ცხოველები რა შესანიშნავი არსებები არიან და ისიც საოცარი ძაღლია, რომელიც ძალიან მიყვარს", — განაცხადა კლოვერის პატრონმა.

ჭკვიანმა კლოვერმა სიმამაცისთვის ჯილდოდ ოჯახისგან სტეიკის დიდი ნაჭერიც მიიღო.