ბესიკ ბოგველი, რომელმაც მზაობა გამოთქვა ნაციონალური მოძრაობის თავმჯდომარის, ნიკა მელიას გირაო გადაიხადოს, ამბობს, რომ მან "სისტემა დატესტა".

"ეს არის, უბრალოდ, დასტური, რომ მმართველი პარტია და მასთან დაკავშირებული ძალები დესტაბილიზაციისა და დაპირისპირების გარეშე ვერ ძლებენ. ღამე არჩევდნენ ვისი კაცი ვარ, რეკავდნენ აქეთ-იქით, როგორ გაბედა. ფსიქოლოგი ვარ, არ შეიძლება ფსიქოლოგს პოზიცია ჰქონდეს?! მე შევთავაზე და პოზიციების გარკვევა ვცადე, დავტესტე სისტემა. ნიკა მელია და ნებისმიერი პოლიტიკოსი არის, პირველ რიგში, საქართველოს მოქალაქე, შესაბამისად, თანაგრძნობაც არის და პროცესებიდან მე ვხედავ, რომ ძალიან ცუდად მიდი ქვეყანა. ფსიქოლოგს არ შეიძლება ჰქონდეს ანტიპათია ვინმეს მიმართ", — განაცხადა ბესიკ ბოგველმა პალიტრანიუსის ეთერში.

ნიკა მელიას ადვოკატის, გიორგი კონდახიშვილის განცხადებით, კვინმე ბესიკ ბოგველმა მზადყოფნა გამოაცხადა მელიას მიმართ გამოყენებული გირაოს თანხის 40 000 ლარის გადახდაზე და ამაზე გენერალურ პროკურატურას უკვე მიმართა.

23 თებერვალს, სპეცრაზმმა ნიკა მელია დააკავა. სამართალდამცავები პარტიის ოფისში გამთენიისას გამოჩნდნენ — რამდენიმე საათში მას შემდეგ, რაც ირაკლი ღარიბაშვილი პრემიერმინისტრად აირჩიეს.

სპეცრაზმი შენობაში შევიდა როგორც სახურავიდან, ისე პირველ სართულზე არსებული შესასვლელებიდან. თავდაპირველად, მათ პირველ სართულზე მყოფი ადამიანები გამოიყვანეს, მოგვიანებით კი, ნიკა მელიას ოთახს მიადგნენ, სადაც ის ოპოზიციის სხვა ლიდერებთან და მხარდამჭერებთან ერთად იმყოფებოდა. მათ ოთახში გამოიყენეს გაზიც. შსს-ს ინფორმაციით, მელიას გარდა, 21 ადამიანი დააკავეს. მათ პოლიციის კანონიერი მოთხოვნისადმი დაუმორჩილებლობას ედავებიან.

თავდაპირველად, ნიკა მელიას დაპატიმრება ყოფილი პრემიერმინისტრის, გიორგი გახარიას გადადგომის გამო გადაიდო. გადადგომა გახარიამ ნიკა მელიას საქმეს დაუკავშირა და თქვა, რომ გუნდში ამაზე "აზრთა სხვადასხვაობა" იყო.

17 თებერვალს თბილისის საქალაქო სასამართლომ დააკმაყოფილა პროკურატურის მოთხოვნა და ნაციონალური მოძრაობის თავმჯდომარეს, ნიკა მელიას აღკვეთის ღონისძიების სახით პატიმრობა შეუფარდა. საქმეს მოსამართლე ნინო ჩახნაშვილი განიხილავდა. აღსანიშნავია, აღკვეთის ღონისძიების შეფარდება არ ნიშნავს საბოლოო გადაწყვეტილებას — განხილვები ამის შემდეგაც უნდა გაგრძელდეს და სასამართლოს მაქსიმუმ 9-თვიანი ვადა აქვს, რომ საბოლოო ვერდიქტი გამოიტანოს. გახარიას გადადგომიდან რამდენიმე წუთში კი, შსს-მ მელიას საქმეზე დაგეგმილი ღონისძიება "დროებით" გადადო.