პრემიერმინისტრის, ირაკლი ღარიბაშვილის განცხადებით, ყოფილი პრემიერმინისტრის, გიორგი გახარიას შესახებ მას შემდეგ გააკეთებს შეფასებას, როცა "ჯერ მოუსმენს კაცს, რას იტყვის და როგორ იტყვის".

"გახარიასთან დაკავშირებით რა კომენტარი შემიძლია გავაკეთო? გიორგი იყო ჩვენი მთავრობის დროს, 8 წლის განმავლობაში ჯერ ბიზნეს ომბუდსმენი, შემდეგ ეკონომიკის მინისტრი, შემდეგ შინაგან საქმეთა მინისტრი, შემდეგ პრემიერმინისტრი. 8 წელი იყო მთავრობის წელი.

მე არ ვიცი, ინფორმაცია არ მაქვს, რას აპირებს. ამიტომ ჯერ დაელოდეთ, ჯერ დაელოდეთ, ჯერ მოვუსმინოთ კაცს, რას იტყვის, როგორ იტყვის, შემდეგ ვიტყვით ჩვენს შეფასებას", — თქვა ღარიბაშვილმა.

გადადგომიდან ერთი თვის შემდეგ, გიორგი გახარია პირველად 22 მარტს გამოჩნდა ჟურნალისტებთან, უფრო სწორად, პირველად მისცა მათ კომენტარი და თქვა, რომ არსად წასვლას არ აპირებს და პოლიტიკაში რჩება. რამდენიმე საათში იმავე შინაარსის წარწერით მან ოფიციალურ ფეისბუქგვერდზე ფოტო გამოაქვეყნა.

იმავე საღამოს კი მან ტვიტერზე დაპოსტა, რომ პოლიტიკური დღისწესრიგის შექმნაზე მუშაობს.

გახარიას განცხადებას პოლიტიკურ წრეებში განხილვა მოჰყვა. ოპოზიციის ნაწილი მას ბიძინა ივანიშვილის დაანონსებულ ოპოზიციურ ძალად აღიქვამს და აცხადებენ, რომ ის "ქართული ოცნება 2"-ს ჩამოაყალიბებს. ნაწილი ფიქრობს, რომ ეს მმართველ გუნდს დაასუსტებს. ყოფილი თანაგუნდელები კი ამბობენ, რომ მის პოლიტიკაში დაბრუნებას მიესალმებიან.

გახარიამ პრემიერმინისტრის თანამდებობა 18 თებერვალს დატოვა და ამის მიზეზად ნაციონალური მოძრაბის თავმჯდომარის, ნიკა მელიას საქმეზე ქართული ოცნების გუნდში აზრთა სხვადასხვაობა დაასახელა.