გაეროს ადამიანის უფლებათა საბჭომ საქართველოს ოკუპირებული ტერიტორიების შესახებ რეზოლუცია მიიღო.

"გაეროს ადამიანის უფლებათა საბჭოში მიღებულ იქნა რეზოლუცია, სახელწოდებით თანამშრომლობა საქართველოსთან — ეს არის ყოველწლიური რეზოლუცია, რომელიც ჩვენ უკვე 4 წელია გაგვაქვს ამ ფორმატში და ეს არის ფოკუსირებული ოკუპირებულ ტერიტორიებზე არსებულ მძიმე ჰუმანიტარულ სიტუაციასთან დაკავშირებით და, ასევე, საერთაშორისო მექანიზმების წვდომასთან დაკავშირებით", — განაცხადა ზალკალიანმა.

ზალკალიანის თქმით, წელს საქართველომ დამატებით 48 ქვეყნის თანასპონსორობა ამ რეზოლუციაზე. მინისტრის განცხადებით, ასევე, ამ რეზოლუციაში ასახულია 21 იანვარს მიღებული სტრასბურგის ადამიანის უფლებათა საბჭოს გადაწყვეტილება რუსეთ-საქართველოს ომთან დაკავშირებით.

"24 მარტს მიღებულ რეზოლუციაში, ადამიანის უფლებათა საბჭო კიდევ ერთხელ ადასტურებს საერთაშორისოდ აღიარებულ საზღვრებში საქართველოს სუვერენიტეტისა და ტერიტორიული მთლიანობის მხარდაჭერას. დოკუმენტში აღიარებულია საქართველოს მთავრობის ძალისხმევა ქვეყანაში დემოკრატიის, კანონის უზენაესობისა და ადამიანის უფლებათა განმტკიცების კუთხით. ამასთან, საბჭო მიესალმება საქართველოს მთავრობის თანამშრომლობას გაეროს ადამიანის უფლებათა უმაღლესი კომისრის ოფისთან და ადამიანის უფლებათა დაცვის სხვა, რეგიონულ თუ საერთაშორისო მექანიზმებთან", — ნათქვამია საგარეო საქმეთა სამინისტროს განცხადებაში.

უწყების თქმით, რეზოლუცია სერიოზულ შეშფოთებას გამოხატავს 2014-2019 წლებში ეთნიკური ქართველების მკვლელობების ფაქტებზე ანგარიშვალდებულების არარსებობის გამო, რაც ხელს უწყობს ადგილზე დაუსჯელობის წახალისებას.

საგარეო საქმეთა სამინისტეოს ინფორმაციით, რეზოლუციაში საბჭო ხაზს უსვამს 2008 წლის 12 აგვისტოს ცეცხლის შეწყვეტის შესახებ შეთანხმების საფუძველზე შექმნილი, ჟენევის საერთაშორისო მოლაპარაკებების მნიშვნელობას.

უწყებაში აცხადებენ იმასაც, რომ დოკუმენტში გამოთქმულია აგრეთვე შეშფოთება, რომ საერთაშორისო მონიტორინგის მექანიზმებს არ ეძლევათ აფხაზეთისა და ცხინვალის რეგიონებში შესვლის საშუალება. აღნიშნულიდან გამომდინარე, რეზოლუციაში არის ოკუპირებულ ტერიტორიებზე დაუყოვნებლივი შეღწევის უზრუნველყოფის შესახებ მოწოდება.