კულტურის მინისტრის, თეა წულუკიანის განცხადებით, ამერიკულმა პოლიტიკურმა სპექტრმა ქართულ ოპოზიციას მკაფიო გზავნილები გამოუგზავნა და გარკვეული რჩევები მისცა მმართველ გუნდს.

"ამერიკულმა პოლიტიკურმა სპექტრმა ქართულ ოპოზიციას მკაფიო გზავნილები გამოუგზავნა და რა თქმა უნდა, გარკვეული რჩევები მოგვცა ჩვენც. მკაფიო გზავნილები ქართული ოპოზიციისადმი, თუ გამოსვლებს კარგად მოუსმინეთ, იყო შემდეგი — ამერიკულმა მხარემ ქართულ ოპოზიციას და ჩვენს საზოგადოებას უთხრა ცალსახად, რომ ქართული ოცნება 2012 წლიდან დღემდე არის მკაფიოდ პროდასავლურ კურსზე და ამ კურსისთვის არასდროს გადაუხვევია. ასევე, ამერიკის შეერთებული შტატების პოლიტიკურმა სპექტრმა თქვა, რომ ის ეყრდნობა ეუთო/ოდირის შეფასებებს და ეუთო/ოდირისა და ყველა სხვა საერთაშორისო დამკვირვებლის შეფასებით, 31 ოქტომბრის არჩევნები იყო თავისუფალ გარემოში ჩატარებული, კონკურენტული და შესაბამისად, აკმაყოფილებდა დემოკრატიულ სტანდარტებს. ამას არ ვამბობ მე, ან რომელიმე ჩემი გუნდის წევრი, ეს ითქვა ამერიკული მხარის მიერ. თუკი არ გვინდა, რომ ვიყოთ ბრმები და გვინდა დავინახოთ რეალობა, ეს ნამდვილად ასეა. ასევე, ამერიკულმა პოლიტიკურმა სპექტრმა ჩვენს ოპოზიციას უთხრა ის, რაც არის ჩვენი დემოკრატიული პროცესისთვის მნიშვნლოვანი, მათ უხთრა, რომ ოპოზიცია პარლამენტში უნდა შევიდეს. მე დიდი იმედი მაქვს, რომ ქართული ოპოზიცია ამას სწორედ ასე გააკეთებს, რადგან ამერიკელებმა როგორც ჩვენს ოპოზიციას უთხრეს, მათი პარლამენტში არ შესვლა პირდაპირ ასხამს რუსულ წისქვილზე წყალს ", — განაცხადა წულუკიანმა.

ამერიკის შეერთებული შტატების სახელმწიფო მდივნის მეორე მოადგილე, ჯორჯ კენტმა სენატის საგარეო კომიტეტის სხდომაზე განაცხადა, რომ ქვეყანაში გარე გამოწვევებთან ერთად, სერიოზული შიდა გამოწვევებია. ისაუბრა საპარლამენტო არჩევნების ჩატარებაზეც. კენტის თქმით, არჩევნები კონკურენტუნარიანად შეფასდა, თუმცა აღინიშნა ისიც, რომ მმართველ პარტიასა და ხელისუფლებას შორის მკაფიო ხაზი არ იყო გავლებული, რამაც არჩევნების მიმართ საზოგადოების ნდობა გარკვეულწილად შეამცირა.