ცესკოში აცხადებენ, რომ მათ მიმართ მიზანმიმართული დისკრედიტაციული კამპანია გრძელდება. ცენტრალურ საარჩევნო კომისიის ცნობით, ამჯერად, ცესკოს შესახებ ცრუ, გადაუმოწმებელი ბრალდებები და არასწორი ინფორმაცია მედიის საშუალებით პოლიტიკური მოძრაობა დროასა და პოლიტიკური გაერთიანება ლელოს წარმომადგენლებმა გაავრცელეს.

"22 მარტს, ცესკოში გამართულ სხდომაზე, კანონმდებლობის სრული დაცვით, საოლქო საარჩევნო კომისიების წევრები აირჩიეს კანონით დადგენილი ხუთწლიანი ვადის ამოწურვის გამო. შესაბამისად, ტყუილია გავრცელებული ინფორმაცია, რომ საოლქო კომისიების თავმჯდომარეებად ქართული ოცნებისთვის მისაღები ადამიანები ინიშნებოდნენ. რაც შეეხება საოლქო საარჩევნო კომისიის თავმჯდომარის არჩევის წესს, პოლიტიკური პარტიების წარმომადგენლებმა აქაც საზოგადოება შეცდომაში შეიყვანეს. შეგახსენებთ, საოლქო საარჩევნო კომისიის თავმჯდომარეები არ ინიშნებიან და მათ არა ცესკო, არამედ თავად საოლქო საარჩევნო კომისიის წევრები ირჩევენ", — აცხადებენ ცესკოში.

მათივე თქმით, პოლიტიკოსების განცხადებაში არაერთი უზუსტობა იყო.

"ამასთან, ყოველგვარ ეთიკას სცილდება ის ფაქტი, რომ პარტიის წარმომადგენლებმა მედიას წარუდგინეს ცესკოს მდივნის ოჯახის წევრების ფოტოები, რომელთა საქმიანობაც საარჩევნო ადმინისტრაციასთან არანაირად არ არის დაკავშირებული. შესაბამისად, მიუღებელია ამგვარი ქმედებები და ამასთან, გაურკვეველია, რას ემსახურებოდა მათი პირადი ფოტოების გამოქვეყნება", — აღნიშნავენ ისინი.

22 მარტს პოლიტიკური მოძრაობა დროას ლიდერმა, ელენე ხოშტარიამ და ლელო-ს
ერთ-ერთი ლიდერმა, საბა ბუაძემ ერთობლივ ბრიფინგზე განაცხადეს, რომ საოლქო კომისიების ხელმძღვანელებად ქართული ოცნებისთვის მისაღებ ადამიანებს ნიშნავენ. მათ, ასევე, ცესკოს სისტემაში კორუფციულ ინტერესებსა და ნეპოტიზმზე ისაუბრეს.