ესოშიეითიდ პრესის (AP) ფოტოგრაფმა, ბურჰან ოზბილიცმა 2017 წლის მსოფლიო პრესის ფოტო კონკურსში გაიმარჯვა. სწორედ მას ეკუთვნის თურქეთში რუსეთის ელჩის მკვლელის კადრები.

ფოტო: AP

ფოტოზე მევლუტ მერტ ალტინტასი ელჩის მკვლელობის შემდეგ სირიის მხარდამჭერ ფრაზებს ყვირის. ფოტო მკვლელობიდან რამდენიმე წამშია გადაღებული.

ინციდენტი 2016 წლის 19 დეკემბერს, თურქეთის დედაქალაქ ანკარაში, ხელოვნების გალერეაში მოხდა.

გამარჯვებული ფოტო ერთ-ერთია იმ სერიის ფოტოებიდან, რომელსაც ფოტოგრაფმა უწოდა თავდასხმა თურქეთში. ფოტოსერიამ გაიმარჯვა კატეგორიაში Spot News Stories (ახალი ამბები შემთხვევის ადგილიდან). კადრებზე ასახულია პერიოდი ელჩზე თავდასხმამდე და თავდასხმის შემდეგ მონაკვეთში.

ბურჰან ოზბილიცს ხელოვნების გალერეაში შესვლა და ფოტოების გადაღება დაგეგმილი არ ჰქონდა. ის იქ მხოლოდ იმიტომ იმყოფებოდა, რომ გამოფენა მისი სახლისკენ გზაზე იმართებოდა.