"ამ ადამიანების შეწყალება არ არის სწორი სიტყვა, რომ გამოვიყენოთ. მათ შესაწყალებელი არაფერი აქვთ. ეს არის უდანაშაულო ხალხი, რომელიც უნდა გამოვიდეს უსამართლო ტყვეობიდან" - ასეთ განცხადებას აკეთებს თავისუფალი დემოკრატების ლიდერი, ირაკლი ალასანია მთავარი პროკურატურის წინ მიმდინარე აქციაზე, რომელიც ე.წ. კაბელების საქმეზე გამოტანილი გამამტყუნებელი განაჩენის გასაპროტესტებლად რამდენიმე წუთის წინ დაიწყო.

აქციაზე იმყოფებიან თავისუფალი დემოკრატები, სხვა პარტიების წევრები, მსჯავრდებულთა ოჯახის წევრები და მათი მხარდამჭერები, არა მხოლოდ თბილისიდან, არამედ რეგიონებიდანაც.

აქციის მონაწილეები სოლიდარობას უცხადებენ საქმეში მსჯავრდებულ ადამიანებს, რომლებიც მათი აზრით, უდანაშაულონი არიან.

ე.წ. კაბელების საქმეზე ბრალდებული თავდაცვის სამინისტროს თანამშრომლები ნუგზარ კაიშაური, დავით წიფურია, არჩილ ალავიძე, გიორგი ლობჟანიძე და გიზო ღლონტი თბილისის საქალაქო სასამართლოს მოსამართლე ბესიკ ბუგიანიშვილმა დამნაშავედ ცნო სახელმწიფო ბიუჯეტის კუთვნილი 4 მილიონამდე ლარის გაფლანგვაში და სასჯელად 7 წლით თავისუფლების აღკვეთა მიუსაჯა.