ქართული ოცნების თავმჯდომარის, ირაკლი კობახიძის განცხადებით, ევროპული საბჭოს პრეზიდენტის წარმომადგენელ, კრისტიან დანიელსონთან დიალოგის დეტალებზე ვერ ისაუბრებს, რადგან ასეთი შეთანხმება აქვთ. მისი თქმით, საზოგადოება დიდი ხანი ელოდა პასუხებს და "ცოტასაც დააცდის", რის შემდეგაც დეტალურ ინფორმაციას მიაწოდებენ.

"რაც შეეხება დიალოგის დეტალებს, ამასთან დაკავშირებით ჩვენ შეთანხმებაც გვაქვს ჩვენს პარტნიორებთან — დიალოგის დეტალებთან დაკავშირებით, ჩვენი მხრიდან ვერ გაკეთდება ვერცერთი განცხადება. გაგრძელდება დიალოგი უახლოეს დღეებში, მომდევნო დღეებში განმავლობაში და მას შემდეგ, რაც დასრულდება ეს პროცესი, შეგვიძლია ჩვენ გავაკეთოთ კომენტარები. მანამდე არცერთ დეტალთან დაკავშირებით განცხადება არ გაკეთდება. [...]

საზოგადოება პასუხს ელოდება უკვე დიდი ხანია და რამდენიმე დღესაც, ალბათ, დაგვაცდიან. ამის შემდეგ უკვე საზოგადოებას წარვუდგენთ დეტალურ ინფორმაციას იმასთან დაკავშირებით, თუ რა იყო მხარეების პოზიციები და როგორ დასრულდა საბოლოო ჯამში", — განაცხადა მან.

კითხვას, რჩება თუ არა მმართველი გუნდისთვის მოლაპარაკების წითელ ხაზებად ნიკა მელიას გათავისუფლება და რიგგარეშე არჩევნების დანიშვნა, კობახიძე ასე პასუხობს:

"იქ იყო საუბარი წითელ ხაზებზე, ყვითელ ხაზებზე, თუ ლურჯ ხაზებზე, ამაზეც ვერ გავაკეთებ ვერანაირ განცხადებას, იმიტომ, რომ ესეც არის დიალოგის დეტალები"

კრისტიან დანიელსონი საქართველოში არსებული პოლიტიკური ვითარების განმუხტვის მიზნით ევროპული საბჭოს პრეზიდენტის, შარლ მიშელის გადაწყვეტილებით ჩამოვიდა. შუამავლის საქართველოში მივლინება ევროკავშირის უმაღლეს წარმომადგენელ ჟოზეფ ბორელთან შეთანხმებით, საქართველოში ევროკავშირის მიერ მხარდაჭერილი შუამავლობისა და პოლიტიკური დიალოგის პროცესის ფარგლებში გადაწყდა.

ხელისუფლებისა და ოპოზიციის წარმომადგენლებს შორის შარლ მიშელის მონაწილეობით შეხვედრა პრეზიდენტის ადმინისტრაციაში პირველ მარტს გაიმართა. შეხვედრაზე პოლიტიკური დიალოგის განახლების 6-პუნქტიან გეგმაზე იმსჯელეს.

მას შემდეგ, რაც სავარაუდოდ, ირაკლი ღარიბაშვილის, ბერა ივანიშვილისა და ანზორ ჩუბინიძის მონაწილეობით ფარული ჩანაწერი გავრცელდა, მოლაპარაკების გაგრძელება კითხვის ნიშნის ქვეშ დადგა. ოპოზიციის ნაწილმა მოითხოვა, რომ ღარიბაშვილი მოლაპარაკებებს აღარ დაესწროს, თუმცა ოპოზიციის საერთო შეხვედრის შემდეგ პარტიებმა განაცხადეს, რომ მმართველ გუნდს მოლაპარაკების ჩაშლის საბაბს არ მისცემენ.

გაიგეთ მეტი: