საქართველოს ახალგაზრდა იურისტთა ასოციაციის წარმომადგენლის, ვახუშტი მენაბდის განცხადებით, ევროპული საბჭოს პრეზიდენტის წარმომადგენელ, კრისტიან დანიელსონთან შეხვედრაზე მან თქვა, რომ მხოლოდ ვადამდელი არჩევნები "ერთჯერადი" გამოსავალია.

"პოლარიზაცია, პროპორციული მიმართულებით მოძრაობა, ბუნებრივ ბარიერთან მიახლოებული პროცედურები, საკითხები, რომლებიც თვითმმართველობის არჩევნებს უკავშირდება. ამ ყველაფერმა ჩვენ უნდა მოგვცეს შესაძლებლობა, რომ ეს კრიზისული პოლიტიკური სისტემა, რომელიც დღეს საქართველოშია და რომელიც იწვევს უკვე 30 წელია განუწყვეტელ დაპირისპირებას ხელისუფლებასა და ოპოზიციას შორის თანამშრომლობით დასრულდეს.

უნდა გადავიდეთ ახალ საფეხურზე, სადაც უკვე შესაძლებელი იქნება ქვეყნის მართვა და პასუხისმგებლობა გაინაწილონ ხელისუფლებამ და ოპოზიციამ ისე, რომ საბოლოო ჯამში ეს ქვეყანა არ გადაჩეხონ.

ვადამდელი არჩევნების მიზანშეწონილობასთან დაკავშირებით ჩვენ არ გვისაუბრია. ეს არის პოლიტიკური მოლაპარაკების თემა. ერთადერთი, რაც მე ახალგაზრდა იურისტთა ასოციაციის სახელით ვთქვი არის ის, რომ მხოლოდ ვადამდელი არჩევნები არის ერთჯერადი გამოსავალი. ჩვენ გვჭირდება უფრო მყარი და წინგადადგმული ნაბიჯები, რაც მომავალში დაგვაზღვევს იმ პოლარიზაციისა და პრობლემებისგან, რომელიც დღეს არის. ეს არის სასამართლო სისტემა, ადგილობრივი თვითმმართველობა, საარჩევნო სისტემა და საპარლამენტო კონტროლის მიმართულებით გადასადგმელი ნაბიჯები", — განაცხადა მენაბდემ.

კრისტიან დანიელსონი საქართველოში არსებული პოლიტიკური ვითარების განმუხტვის მიზნით ევროპული საბჭოს პრეზიდენტის, შარლ მიშელის გადაწყვეტილებით ჩამოვიდა. შუამავლის საქართველოში მივლინება ევროკავშირის უმაღლეს წარმომადგენელ ჟოზეფ ბორელთან შეთანხმებით, საქართველოში ევროკავშირის მიერ მხარდაჭერილი შუამავლობისა და პოლიტიკური დიალოგის პროცესის ფარგლებში გადაწყდა.

ხელისუფლებისა და ოპოზიციის წარმომადგენლებს შორის შარლ მიშელის მონაწილეობით შეხვედრა პრეზიდენტის ადმინისტრაციაში პირველ მარტს გაიმართა. შეხვედრაზე პოლიტიკური დიალოგის განახლების 6-პუნქტიან გეგმაზე იმსჯელეს.

მას შემდეგ, რაც სავრაუდოდ, ირაკლი ღარიბაშვილის, ბერა ივანიშვილისა და ანზორ ჩუბინიძის მონაწილეობით ფარული ჩანაწერი გავრცელდა, მოლაპარაკების გაგრძელება კითხვის ნიშნის ქვეშ დადგა. ოპოზიციის ნაწილმა მოითხოვა, რომ ღარიბაშვილი მოლაპარაკებებს აღარ დაესწროს, თუმცა ოპოზიციის საერთო შეხვედრის შემდეგ პარტიებმა განაცხადეს, რომ მმართველ გუნდს მოლაპარაკების ჩაშლის საბაბს არ მისცემენ.

გაიგეთ მეტი:

• შესაძლო ვადამდელი არჩევნები, რეფორმები — რა წერია მიშელის 6-პუნქტიან გეგმაში