ქართული ოცნების ლიდერმა, მამუკა მდინარაძემ დღეს, პარლამენტის 10 თებერვლის პლენარულ სხდომაზე მოსმენების კანონპროექტზე მიმდინარე დებატების დროს, პარტია ევროპული საქართველოს წევრებს უპასუხა მედიაზე ზეწოლასთან დაკავშირებით. მდინარაძემ ოპონენტების მსგავსად, ტრიბუნასთან პლაკატი გაშალა, სადაც ტელეკომპანია იმედის დარბევის კადრები იყო გამოსახული:

"უნდა იცოდეთ რა წარსული აქვთ იმ ადამიანებს, რომლებიც ძალუმად იღწვიან, რომ თითქოს მედია არ არის თავისუფალი და მედიაზე ვიღაც შტურმს ახორციელებს, არ ვიცი ამას რაღა ჰქვია, როცა ნაციონალური მოძრაობის წარმომადგენლები ამბობენ გვისმენენ და ხალხი ჩურჩულით ლაპარაკობსო, არ ვიცი იმას რაღა ჰქვია, რომ ნაციონალური მოძრაობის წარმომადგენლები ამბობენ, რომ მედიაზეა ზეწოლა".

მანამდე, პარტია ევროპული საქართველოს ლიდერებმა პარლამენტში დიდი პლაკატი გამოაკრეს, სადაც საზოგადოებრივი მაუწყებლისა და ტელეკომპანია რუსთავი 2-ის ლოგოებია გამოსახული, წარწერით "არა მედიაზე შტურმს". პლაკატის გამოკვრას საპარლამენტო უმრავლესობის მხრიდან პროტესტი მოჰყვა.