საქართველოს ექსპრეზიდენტის, მიხეილ სააკაშვილის თქმით, ნაციონალური მოძრაობის თავმჯდომარის, ნიკა მელიას დაპატიმრების შემთხვევაში "ყველაზე რადიკალურ გადაწყვეტილებას" მიიღებს. ასე უპასუხა მან TV პირველის ჟურნალისტის კითხვას — ჩამოვა თუ არა საქართველოში მელიას დაპატიმრების შემთხვევაში.

"ამას გამოვაცხადებ, მაგრამ მე მივიღებ ყველაზე უფრო რადიკალურ გადაწყვტილებას. თუ მოხდა ის, რასაც ისინი აპირებენ და ისინი ამას აპირებენ, ჩვენ არ ვაპირებთ უკან დახევას. ჩვენ არ გვინდა ეს არაფერი, ჩვენ გვინდა საქართველოში იყოს მშვიდობა, დემოკრატია, ერთად დავძლიოთ კოვიდი", — განაცხადა მან.

პოლიტიკური კრიზისი საქართველოში 2020 წლის საპარლამენტო არჩევნების შედეგების გამოქვეყნების შემდეგ დაიწყო. ოქტომბერში ჩატარებულ არჩევნების შედეგებს ოპოზიცია არ აღიარებს და ხელახალი არჩევნების დანიშვნას თვეებია ითხოვს.

ამას თან დაერთო ნაციონალური მოძრაობის თამჯდომარის, ნიკა მელიასთვის აღკვეთის ღონისძიების სახით პატიმრობა შეფარდება.

მელიასთვის პატიმრობის შეფარდებიდან რამდენიმე საათში 18 თებერვალს საქართველოს პრემიერმინისტრი, გიორგი გახარია გადადგა. გახარიას გადადგომიდან რამდენიმე წუთში კი, შსს-მ მელიას საქმეზე დაგეგმილი ღონისძიება "დროებით" გადადო.

17 თებერვალს თბილისის საქალაქო სასამართლომ დააკმაყოფილა პროკურატურის მოთხოვნა და ნაციონალური მოძრაობის თავმჯდომარეს, ნიკა მელიას აღკვეთის ღონისძიების სახით პატიმრობა შეუფარდა. საქმეს მოსამართლე ნინო ჩახნაშვილი განიხილავდა. აღსანიშნავია, აღკვეთის ღონისძიების შეფარდება არ ნიშნავს საბოლოო გადაწყვეტილებას — განხილვები ამის შემდეგაც უნდა გაგრძელდეს და სასამართლოს მაქსიმუმ 9-თვიანი ვადა აქვს, რომ საბოლოო ვერდიქტი გამოიტანოს.