"ადრე თუ გვიან, ყველა დატოვებს თანამდებობას" — ასე პასუხობს საგარეო საქმეთა მინისტრობის კანდიდატი, დავით ზალკალიანი კითხვას აპრილში მისი სავარაუდო გადადგომის შესახებ. ფორმულას ჟურნალისტმა ზალკალიანს უთხრა, რომ ჰქონდათ ინფორმაცია რამდენიმე მინისტრის, მათ შორის ზალკალიანის გადადგომის შესახებ, რაზეც ზალკალიანმა განაცხადა, რომ შეუცვლელი არავინ არ არის.

ზალკალიანის თქმით, რომ არა კონკრეტული სიტუაცია ახლა იქ არ იქნებოდა, სადაც არის,

"მე რომ არ ვაცნობიერებდე იმ პასუხისმგებლობას ამ მწვავე გეოპოლიტიკურ სიტუაციაში და იმ საფრთხეების წინაშე, რა საფრთხეების წინაშეც დგას ჩემი ქვეყანა, მე დღეს აქ არ ვიქნებოდი", — აღნიშნა მან.

18 თებერვალს პრემიერმინისტრი, გიორგი გახარია თანამდებობიდან გადადგა. ამის შესახებ მან სპეციალურ ბრიფინგზე განაცხადა და ეს გადაწყვეტილება ნიკა მელიას საქმეს დაუკავშირა. მან ახსენა ისიც, რომ გუნდში ამაზე აზრთა სხვადასხვაობაა.

იმავე დღეს პრემიერმინისტრობის კანდიდატად, ქართულმა ოცნებამ ყოფილი პრემიერი და მოქმედი თავდაცვის მინისტრი ირაკლი ღარიბაშვილი წარადგინა. მეორე დღეს ღარიბაშვილმა სამთავრობო გუნდი წარადგინა, სადაც მხოლოდ 2 ცვლილება იყო — მისი შემცვლელად მისივე პირველი მოადგილე, ხოლო ინფრასტრუქტურის და ვიცე-პრემიერის, მაი ცქიტიშვილის შემცვლელადაც ასევე პირველი მოადგილე. ცქიტიშვილმა განაცხადა, რომ წასვლა თავად სურდა.