პრემიერმინისტრის, გიორგი გახარიას თქმით, თუ ოპოზიციაში "იმდენი ტვინი არ აქვთ", რომ პასუხისმგებლობა გაიაზრონ, იმ მოქალაქეებს მაინც უნდა მიაქციონ ყურადღება, ვინც ხმა მისცა და "შევიდნენ იქ, სადაც პოლიტიკა კეთდება".

"ყველამ ნება უნდა იბოძოს, გაიაზროს პასუხისმგებლობა, იმდენი ტვინი თუ არ აქვს, რომ ეს პასუხისმგებლობა გაიაზროს, მოქალაქეებს მაინც მიაქციოს ყურადღება, რომლებმაც მას ხმა მისცეს და ნება იბოძოს შევიდეს და იყოს იქ, სადაც პოლიტიკა კეთდება და არა ქუჩაში", — განუცხადა მან ჟურნალისტებს.

გახარიამ ოპონენტების ქცევა რამდენჯერმა "პოლიტიკურ ხულიგნობად" მოიხსენია. მათ შორის, ნაციონალური მოძრაობის თავმჯდომარის უარი გირაოს გადახდაზე და ექსპრეზიდენტის მოწოდებები დაუმორჩილებლობაზე.

"მე ამას ვაფასებ, როგორც პოლიტიკურ ხულიგნობას, მეტ არაფერს. ადამიანებს, როდესაც პოლიტიკური, ნორმალური კონტენტის შექმნა არ შეუძლიათ, შინაარსობრივ დებატში შემოსვლა არ შეუძლიათ, ისინი უბრალოდ პოლიტიკურად ხულიგნობენ. ვიღაცა ხულიგნობს აქ საქართველოში, ვიღაცა პოლიტიკურად ხულიგნობს ქვეყნის გარედან, ამას რა მნიშვნელობა აქვს. ჩვენი მოქალააქეები ამას ხედავენ და აფასებენ. ჩვენმა მოქალაქეებმა ძალიან კარგად იციან, ვინ ზრუნავს მათზე და რას ნიშნავს ადამიანებზე ზრუნვა და ეს ყველაფერი არჩევნებშიც აისახა", — განაცხადა მან.