ქართული ოცნების ერთ-ერთი ლიდერი, მამუკა მდინარაძე ნაციონალური მოძრაობის თავმჯდომარეს, ნიკა მელიას "გარანტიას" აძლევს, რომ მისი გირაოს გადახდას არავინ აპირებს. ამის შესახებ მან სპეციალურ ბრიფინგზე ისაუბრა.

"კიდევ ერთხელ იყო დადასტურება სიმხდალის და საზოგადოების მოტყუების მცდელობის. ეს ადამიანი, იცით, რომ არ აპირებს მისი თქმით, თითქოს გადაიხადოს გირაო. სინამდვილეში, მისი განცხადებიდან ერთადერთი დასკვნის გამოტანა შეიძლება, რომ ნაცმოძრაობა აპირებს, მისი გიარო გადაიხადოს ე.წ. გვერდითა გზებით. მე დღეს აქ თქვენს წინაშე მისი განცხადებიდან რამდენიმე წუთის შემდეგ არ ვიდგებოდი, თავად რომ არ იშვერდნენ ხელს, რომ თითქოს ჩვენ გვაქვს რაღაც აღტკინება და სურვილი, რომ მაინცდამაინც ნიკა მელიას გადავუხადოთ გირაო, რაც არასდროს მომხდარა სხვების შემთხვევაში", — განაცხადა მდინარაძემ.

მისი თქმით, თუ მელიას უნდა გირაოს გადახდა, "მანიპულაციებს" თავი უნდა დაანებოს, დაექვემდებრაოს კანონს და არა, "მიხეილ სააკაშვილის სურვილებს".

"არჩევნების გაყალბება გაგვიგია, მაგრამ გირაოს გადახდევინების გაყალბების მცდელობა არ გამეგო აქამდე", — განაცხადა დღეს ნაციონალური მოძრაობის თავმჯდომარემ, ნიკა მელიამ. როგორც მელია განმარტავს, ის არ აპირებს აღნიშნული გირაოს გადახდას, რადგან მიაჩნია, რომ 20 ივნისის საქმე პოლიტიკურად მოტივირებულია.

მელიამ, ასევე, თქვა ისიც, რომ ქართული ოცნების წარმომადგენლებმა და "ოცნებაზე" ორიენტირებულმა მედიამ მისი პარტიის წევრების "დარაჯი" დაიწყეს. მისი განცხადებით, მათ ეუბნებიან, რომ არსებობს თითქოს "ვინმე მითიური მოქალაქე", რომელიც ნიკა მელიას სასარგებლოდ გადაიხდის გირაოს. სწორედ ამას გამოეხმაურა მამუკა მდინარაძე და თქვა, რომ ნაციონალური მოძრაობა ქართული ოცნებისაკენ "იშვერს ხელს", რომ თითქოს მმართველი პარტიიდან ცდილობენ ნიკა მელიას გიაროს გადახდას.

5 თებერვალს, გენერალურ პროკურატურაში განაცხადეს, რომ ნიკა მელიას აღმკვეთი ღონისიძიების, გირაოს პირობების შესრულებისთვის ერთკვირიან ვადას აძლევენ. თანხის გადაუხდელობის შემთხვევაში პროკურატურა სასამართლოს აღკვეთის ღონისძიების პატიმრობით შეცვლის თაობაზე მიმართავს.

უწყების ცნობით, "მიუხედავად იმისა, რომ ბრალდებულ ნიკა მელიას საკუთრებაში გააჩნია უძრავი ქონება, რომელიც გირაოს უზრუნველსაყოფად საკმარისია, აღკვეთის ღონისძიების პირობა არ შეასრულა".

მელია აცხადებს, რომ პროკურატურის მიერ მოთხოვნილ გირაოს არ გადაიხდის.

ნიკა მელიას საქმე

ნიკა მელიას საქართველოს პროკურატურა 20 ივნისის აქციის საქმეზე ძალადობრივი ჯგუფის ხელმძღვანელობას ედავება.

2019 წლის 27 ივნისს თბილისის საქალაქო სასამართლომ მას 30 ათასი ლარის ოდენობის გირაო შეუფარდა. გარდა ამისა, მოსამართლემ სხვა შეზღუდვებიც დაუწესა:

• საცხოვრებელი ადგილის (სახლის) დატოვება საგამოძიებო ორგანოს ინფორმირებისა და თანხმობის გარეშე;
• საზოგადოებრივი თავშეყრის ადგილას საჯარო განცხადებების გაკეთება; მოწმეებთან ნებისმიერი სახის კომუნიკაცია;
• დაეკისრა საგამოძიებო ორგანოსთვის პასპორტისა და პირადობის დამადასტურებელი სხვა დოკუმენტის ჩაბარების ვალდებულება.

2020 წლის 1 ნოემბერს, საზოგადოებრივი თავშეყრის ადგილას საჯარო განცხადების გაკეთებისას, მელიამ ელექტრონული მონიტორინგისთვის განკუთვნილი სამაჯური მოიხსნა.

ამის შემდეგ, პროკურატურამ აღკვეთის ღონისძიების გამკაცრება, კერძოდ, გირაოს გაზრდა 100 000 ლარამდე მოითხოვა. თბილისის საქალაქო სასამართლოს 2020 წლის 3 ნოემბრის განჩინებით, მელიას მიმართ მანამდე გამოყენებული აღკვეთის ღონისძიება გამკაცრდა და გირაოს ოდენობა 40 000 ლარით გაიზარდა.