ქართული ოცნების დეპუტატმა, ირაკლი ზარქუამ ბიძინა ივანიშვილს კიდევ ერთხელ გადაუხადა მადლობა და აღნიშნა, რომ ამას ყოველთვის გააკეთებენ. ზარქუა ივანიშვილის მადლიერია იმისთვის, რომ "ქვეყანა განსაცდელს ააცდინა და სწორ რელსებზე დააყენა". ასევე, მადლიერია იმისთვის, რომ ქვეყანას "რეჟიმი ჩამოაცილა" და პოლიტიკიდან თავისი ნებით წავიდა.

"დიახ, კიდევ ერთხელ, დღეს არ მითქვამს და თქვენი დახმარებით მადლობას ვეტყვი ბიძინა ივანიშვილს იმისთვის, რომ მან 2011-2012 წელს რეჟიმი ჩამოაცილა საქართველოს. მკვლელთა პარტია და მწვალებელთა პარტია ჩამოაცილა. თქვენ თუ არ მეთანხმებით, ის, რაც ხდებოდა მანამდე, ეს უკვე თქვენი არჩევანია. ეს ჩამოგვაცილა.

მერე, თავისი ნებით, საერთოდ ჩამოშორდა პოლიტიკას და გვერდზე გავიდა. ამიტომ, კიდევ ერთხელ ვამბობ, ადამიანს უანგაროდ 9 მილიარდ ლარზე მეტი აქვს ამ ქვეყანაზე დახარჯული. მათ შორის, ცალკეული ინსტიტუციების თუ ეკლესიების მშენებლობაზე, ეს სხვა თემაა, მაგრამ ამ ადამიანს ნამდვილად ეკუთვნის მადლობა და ჩვენ ყოველთვის ვეტყვით მადლობას, არა პარტიული დამსახურების გამო, არამედ იმიტომ, რომ ქვეყანა განსაცდელს ააცდინა და სწორ რელსებზე დააყენა", — განაცხადა მან პირველი არხის ეთერში.

ეს პირველი შემთხვევა არ არის, როდესაც მმართველი გუნდის წევრები დამაარსებელს, ბიძინა ივანიშვილს მადლობას უხდიან. "ოცნების" წევრები ივანიშვილის მადლიერი არიან პოლიტიკაში მოსვლისთვის, პოლიტიკიდან წასვლისთვის და ამ შუალედში გადადგმული ყველა ნაბიჯისთვის, მათ შორის ისეთებისთვისაც, რასაც სამოქალაქო საზოგადოება და ოპოზიცია აკრიტიკებდა.