იუსტიციის ყოფილი მინისტრი და მე-10 მოწვევის პარლამენტის წევრის, თეა წულუკიანის თქმით, ის ფაქტი, რომ ნარკოტიკული საშუალებების ოდენობის კანონპროექტი 3 წლის წინ არ დამტკიცდა, "კაკი ზოიძის და დავით [სუბელიანის] ულტიმატუმის" დამსახურებაა.

"3 წელი დავკარგეთ იმიტომ, რომ ბატონ დავითს [სუბელიანი] და კაკი ზოიძეს ჰქონდათ ულტიმატუმი: ან ყველაფერი, ან არაფერი. მე თქვენ გითხარით, ბატონო დავით, მე ეს გზა გავიარე, არ ექნება მხარდაჭერა ამ ყველაფერს, ჩვენ მხარდაჭერა გვექნება პოლიტიკური, იმიტომ, რომ პარლამენტი უყრის კენჭს კანონებს. ჩვენ დავჯდეთ და ვწეროთ და ვიკითხოთ რამდენიც გვინდა, ეს არ არის ასე. პოლიტიკური მხარდაჭერა უნდა ჰქონდეს და ხმები ითვლება, როგორც არითმეტიკაშია ისე. მე თქვენ გითხარით, გამატანინეთ ეს დოზები, რომელთაც აქვთ მხარდაჭერა და ვიაროთ ნაბიჯ-ნაბიჯ იმ მიზნისკენ, რომ ის, ვინც არის ჯანდაცვის პაციენტი, არ იყოს ციხეში, თქვენ რა გააკეთეთ? საბჭოს გვერდის გავლით დაწერეთ EMC-სთან და სხვებთან ერთად ის დიდი რეფორმა და კაკი ზოიძემ შემოაგდო პარლამენტში, ეს არის რეალობა. დაღუპეთ ის, რაზეც ახლა დღეს ვსაუბრობთ, 3 წელი დააკარგვინეთ იმ ადამიანებს, ვინც ციხეში ელოდება ამ კანონპროექტს", — განაცხადა წულუკიანმა.

მისივე თქმით, თუ ისინი განაგრძობენ მთავრობის "მოკრძალებულ თავში ჩარტყმას", არასდროს არაფერი ამ სფეროში არ გაუმჯობესდება.

"თუ თქვენ გააგრძელებთ ყველა მთავრობის თუ პარლამენტის კი ბატონო, ფრთხილ, კი ბატონო მოკრძალებულ თავში ჩარტყმას, გარანტიას გაძლევთ, რომ არასდროს არაფერი ამ სფეროში არ გაუმჯობესდება და რაღაცნაირად შეუამხანაგდით ამ ხელისუფლებას და რაღაც მოიწონეთ. ვზივარ და მთელი სხდომა ვისმენ, რომ ეს არ ვარგა, თუ არ ვარგა, მოვხსნათ", — თქვა მან.

საქართველოს პარლამენტში დარეგისტრირდა კანონრპოექტი, რომელიც ზოგიერთი ნარკოტიკული საშუალებისთვის ოდენობების დაზუსტებას ითვალისწინებს. მისი ინიციატორები არიან: მიხეილ სარჯველაძე, თეა წულუკიანი, დავით სერგეენკო, დიმიტრი ხუნდაძე, ვლადიმერ კახაძე და ალუდა ღუდუშაური.

საკომიტეტო განხილვას ესწრებოდა მოძრაობა თეთრი ხმაურის აქტივისტი დავით სუბელიანიც, რომელიც ნარკოდანაშაულთან დაკავშირებულ საქმიანობაში აქტიურ მონაწილეობას იღებს. მან გარკვეული კრიტიკა გამოთქვა იმასთან დაკავშირებით, რომ შეიძლება ეს კანონპროექტი არ ყოფილიყო საკმარისი.