საქართველოს ეკონომიკის მინისტრის, ნათია თურნავას განცხადებით, რეგულარულ ფრენებზე შეზღუდვები, სავარაუდოდ, თებერვლის თვეში მოიხსნება.

"იხსნება, ასევე, ფრენები. კონკრეტულ თარიღებს ვერ დავასახელებთ, მაგრამ თებერვლის თვე იქნება სავარაუდოდ ის თვე, როდესაც რეგულარულ ფრენებზე შეზღუდვებს მოვხსნით. მაგრამ ეს არ ნიშნავს ქაოტურ და უკონტროლო შემოსვლას ქვეყანაში. ეს იქნება ძალიან კონკრეტული, კონტროლირებადი ტესტებით, ვაქცინაციის საბუთით ან სხვა ადეკვატური დოკუმენტით", — განაცხადა თურნავამ TV იმედის ეთერში.

მისივე თქმით, ფრენების განახლება ტურისტული სეზონის აღდგენის პირველი იმედია.

კორონავირუსის პანდემიის გამო, უწყებათაშორისი საკოორდინაციო საბჭოს გადაწყვეტილებით, საქართველოში საჰაერო მიმოსვლა სრულად 21 მარტიდან შეწყდა. რამდენიმე თვის განმავლობაში ფრენის უფლება მხოლოდ საქართველოს ავიახაზებს ჰქონდა, რომელიც სპეცრეისებს ასრულებდა.

ამ დროისათვის საქართველოდან რეგულარული ფრენები ევროპის რამდენიმე ქვეყანასთან სრულდება. ნაწილ ქვეყნებთან კი მხოლოდ ჩარტერული რეისები ხორციელდება, რომლებსაც უცხოეთიდან საქართველოს მოქალაქეები ჩამოჰყავს.