ჯო ბაიდენის ინაუგურაციამდე 2 დღით ადრე, ვაშინგტონში, კაპიტოლიუმის შენობაში ე.წ ლოქდაუნი გამოცხადდა. მიზეზი კაპიტოლიუმიდან რამდენიმე ბლოკით დაშორებულ ლოკაციაზე ხანძრის გაჩენა იყო.

Reuters-ს ინფორმაციით, "გარეგანი საფრთხის" გამო, აკრძალულია შენობაში შესვლა, ხოლო შიგნით მყოფ ადამიანებს ადგილზე დარჩენა მოსთხოვეს.

როგორც BBC თვითმხილველზე დაყრდნობით აცხადებს, კაპიტოლიუმის შენობის მიმდებარე ტერიტორიაზე დაკვამლიანება შეინიშნებოდა. სპეციალური სამსახურის განცხადებით, მცირედი ცეცხლი უკვე ლიკვიდირებულია.

შენობის ირგვლივ განლაგებულია ეროვნული გვარდიის ათასობით წევრი.

უსაფრთხოების ზომების გაძლიერება ქვეყანაში 6 იანვრის შემდეგ დაიწყო, როცა კაპიტოლიუმთან მიმდინარე ტრამპის მხარდამჭერების აქცია დაპირისპირებაში გადაიზარდა. დემონსტრანტებმა ბარიერი გაარღვიეს და შენობაში შეიჭრნენ. კონგრესში ევაკუაცია გამოცხადდა, ქალაქში კი კომენდანტის საათი.

რამდენიმესაათიანი არეულობის შემდეგ სენატში სხდომა განახლდა. ბოლო ინფორმაციით, ოთხი ადამიანი გარდაიცვალა. ერთ-ერთ ქალს კაპიტოლიუმში პოლიციამ შეჭრის დროს ესროლა.

არეულობის შედეგად დაშავდა პოლიციის სულ მცირე 14 თანამშრომელი. ორი ჰოსპიტალიზირებულია. ბოლო მონაცემებით, დაკავებულია 52 პირი: 4 ლიცენზიის გარეშე იარაღის ტარებისთვის, 1 აკრძალული იარაღის ტარებისთვის, 47 კი კომენდანტის საათის დარღვევისთვის.

6 იანვარს მოძალადე ჯგუფების წახალისების ბრალდებით ამერიკის შეერთებული შტატების წარმომადგენელთა პალატამ აჟამინდელ პრეზიდენტს, დონალდ ტრამპს იმპიჩმენტი მეორედ გამოუცხადა.