პარლამენტში ქართული ოცნების ფრაქციის ლიდერის, მამუკა მდინარაძის განცხადებით, პარტიაში გენერალური მდივნის თანამდებობა არ უქმდება. ამის შესახებ მან ჟურნალისტებს განუცხადა.

"ეს თანამდებობა, ბუნებრივია, არ უქმდება. კახის [კალაძეს], როგორც ჩანს, მოერიდა საკუთარ თავზე საუბარი, ხომ არ იტყოდა, ეს სტატუსი პარტიაში როგორ უნდა გაუქმდესო. მივაწეროთ თავმდაბლობას. არ ვიცი", — აღნიშნა მდინარაძემ.

უკვე რამდენიმე დღეა, რაც მედიაში ვრცელდება ინფორმაცია, რომ ქართულ ოცნებაში გენერალური მდივნის თანამდებობა უქმდება, რომელიც ამჟამად თბილისის მერს, კახა კალაძეს უკავია.

კახა კალაძის განცხადებით, მისი კანდიდატურა პარტიის თავმჯდომარის პოზიციაზე არ წარადგინეს, რადგან "ამხელა ქალაქის მერია", სადაც ბევრი პრობლემაა, რომელიც ეტაპობრივად მოგვარებას საჭიროებს. მისივე განმარტებით, იგივე მიზეზის გამო არ წარადგინეს ქვეყნის პრემიერმინისტრი, გიორგი გახარიაც. რაც შეეხება პარტიაში მისი თანამდებობის გაუქმებას, კალაძემ აღნიშნა, რომ ეს ხვალ გაირკვევა.

ბიძინა ივანიშვილის პოლიტიკიდან ხელმეორედ წასვლის შემდეგ ქართული ოცნების თავმჯდომარის პოსტი ვაკანტური გახდა. პარტიამ აღნიშნულ პოსტზე პარლამენტის ყოფილი თავმჯდომარე და ამჟამად უმრავლესობის ლიდერი, ირაკლი კობახიძე წარადგინა. 16 იანვარს პარტიის დელეგატები მას ოფიციალურად აირჩევენ. გარდა ამისა, დასახელდება პოლიტსაბჭოს შემადგენლობაც.