ლელოს ერთ-ერთი ლიდერის, მამუკა ხაზარაძის თქმით, მისი ნათქვამი, რომ რიგგარეშე არჩევნების ჩატარების იმედი 2021 წელში არ აქვს და უნდა ჩატარდეს 2022-ში არის ვერსია, რომელსაც ფიქრი და განსჯა სჭირდება და არა თავდასხმა. ამის შესახებ მან TV პირველი ეთერში ისაუბრა.

"ეს არის ჩემი პოზიცია, ერთ-ერთი ვერსია, რომელიც საჭიროებს ფიქრს და მსჯელობას და არა თავდასხმას, შესაბამისად, ქვეყნისთვის მნიშვნელოვანია სრულად პროპორციული არჩევნები, მაგრამ ეს არის ნაბიჯი მეორე. პლებისციტსაც უამრავი წინააღმდეგი და მომხრე ჰყავდა. ყველა ეს გზა არის იმისათვის გასააზრებელი, რომ საბოლოო ჯამში, ქვეყანა მდგომარეობიდან გამოვიყვანოთ, ამიტომ, მარტო ამაზე ვისაუბროთ და სხვა თემაზე ტაბუ იქნას დადებული, რანაირი იდეაც არ უნდა იყოს იმიტომ, რომ ვიღაცას ეს არ მოსწონს, ამის კატეგორიული წინააღმდეგი ვარ. თავისუფალი ადამიანი ვარ, ვფიქრობ გამოსავალზე და ვთავაზობ ამ გამოსავალს ყველას", — განაცხადა მამუკა ხაზარაძემ.

ხაზარაძემ, ასევე, განმარტა, რომ არ არის საუბარი 2021 წლის რიგგარეშე არჩევნების 2022 წელში გადატანაზე, არამედ, საუბარია სრულად პროპორციულ არჩევნებზე 2022-ში.

მე-10 მოწვევის პარლამენტმა ოფიციალურად მუშაობა 11 დეკემბერს დაიწყო. პარალელურად კი, ბარიერგადალახულმა ოპოზიციურმა პარტიებმა საკუთარ მანდატებზე უარი თქვეს. ქართული ოცნება ამბობს, რომ ყველა ასეთ პარტიას მანდატები გაუუქმდება, ხოლო დაფინანსება შეუწყდება. მმართველი ძალის განცხადებითვე, ისინი დააინიცირებენ კანონპროექტს, რომლის თანახმადაც საარჩევნო რეგისტრაცია გაუუქმდება პარტიას, რომლის ლიდერიც კონსტიტუციურ საარჩევნო ცენზს არ აკმაყოფილებს, კერძოდ, არის უცხო ქვეყნის მოქალაქე ან მისჯილი აქვს თავისუფლების აღკვეთა.