ნაციონალური მოძრაობის ერთ-ერთი ლიდერის, ნიკა მელიას განცხადებით, პარტია გირჩი მისთვის "როლ მოდელია", რადგან მათ არჩევნებზე ძალიან ცოტა ფული დახარჯეს. ამის შესახებ მელიამ ფეისბუქ live-ში ისაუბრა.

"პარტია გირჩი ჩემთვის არის როლ მოდელი. იცით რა თვალსაზრისით? პრაქტიკულად ერთი თეთრი.. ძალიან ცოტა ფული დახარჯა არჩევნებზე. თბილისში გავიდა მე-3 ადგილზე. როგორ? მე ვიცი როგორ და ბევრმა იცის. ძალიან მჭიდრო კომუნიკაცია ჰქონდა საზოგადოებასთან, მის პოტენციურ ამომრჩეველთან. ძალიან მჭიდრო, პრაქტიკულად ყოველდღიური სხვადასხვა ფორმატში, სხვადასხვა პლატფორმაზე და მე-3 ადგილზე გავიდა", — განაცხადა მან.

მისივე თქმით, ნაციონალურ მოძრაობა, არ იყენებს იმ შესაძლებლობებს, რომელიც თან ახლავს მაღალტექნოლოგიურ ერას, ამიტომ მელიას განცხადებით, პარტიის თავმჯდომარედ არჩევის შემთხვევაში მას ამ მხრივაც მეტი პასუხისმგებლობა ექნება.

ერთიანი ნაციონალური მოძრაობის პოლიტსაბჭოს წევრებმა პარტიის თავმჯდომარის კანდიდატებად ნიკა მელია და ლევან ვარშალომიძე წარადგინეს. თავმჯდომარეს ფეისბუქით აირჩევენ. კენჭისყრა 21 დეკემბრს დაიწყო და 25 დეკემბრის 21:00 სთ-მდე გაგრძელდება.

ენმ-ს პარტიის თავმჯდომარის პოსტი ვაკანტური მას შემდეგ გახდა, რაც ნაციონალური მოძრაობის თავმჯდომარემ, გრიგოლ ვაშაძემ პარტია 15 დეკემბერს დატოვა. ვაშაძემ ნაწილობრივ ისაუბრა წასვლის მიზეზებზეც. მან აღნიშნა რომ, არ ეთანხმება პარტიის ხელმძღვანელობის უმრავლესობის მიერ პარტიის წევრებთან კონსულტაციების გარეშე არჩეულ ტაქტიკას. მისივე თქმით, მისთვის კიდევ უფრო მიუღებელია პარტიული სტრატეგიის არარსებობა. ეს კი მხოლოდ ქართულ ოცნებას აძლევს ხელს.