ქართული ოცნების დეპუტატის, თეა წულუკიანის განცხადებით, საქართველოში "ტრენდია", რომ თავისუფლება აბსოლუტურად ყველაფრის უფლებას ნიშნავს. მისი თქმით, თავისუფლება ყველაფრის უფლება არა, თუმცა "თითქმის ყველაფრის" უფლება არის.

"არის ტრენდები, რომლებიც პირდაპირ მავნებლობაა. მაგალითად, ტრენდი იმის შესახებ, რომ თავისუფლება აბსოლუტურად ყველაფრის უფლებას ნიშნავს. თავისუფლება ყველაფრის უფლება არ არის, ეს არის თითქმის ყველაფრის უფლება. ეს თითქმის არის პატარა სიტყვა, მაგრამ მისი შინაარსი რა არის, უნდა ვასწავლოთ ბაღებში, სკოლებში და დავხვეწოთ უმაღლეს სასწავლებლებში", — განაცხადა წულუკიანმა.

დღეს პარლამენტში მთავრობას უსმენენ. ოფიციალურად პარლამენტმა მუშაობა 11 დეკემბერს დაიწყო. ამის პარალელურად, ბარიერგადალახულმა ოპოზიციურმა პარტიებმა საკუთარ მანდატებზე უარი თქვეს. ქართული ოცნება ამბობს, რომ ყველა ასეთ პარტიას მანდატები გაუუქმდება, ხოლო დაფინანსება შეუწყდება. მმართველი ძალის განცხადებითვე, ისინი დააინიცირებენ კანონპროექტს, რომლის თანახმადაც საარჩევნო რეგისტრაცია გაუუქმდება პარტიას, რომლის ლიდერიც კონსტიტუციურ საარჩევნო ცენზს არ აკმაყოფილებს, კერძოდ, არის უცხო ქვეყნის მოქალაქე ან მისჯილი აქვს თავისუფლების აღკვეთა.

თუ გინდა გაიგო, როგორ მუშაობს ან ვერ მუშაობს მე-10 მოწვევის პარლამენტი, რა ინიციატივები აქვთ დეპუტატებს და ზოგადად, როგორ მიიღება გადაწყვეტილებები, რომლებიც ჩვენს ყოველდღიურობას განსაზღვრავს, შემოგვიერთდი ჯგუფში – რა ხდება პარლამენტში.