ეკატერინე ტიკარაძე ისევ ჯანდაცვის მინისტრი იქნება. პრემიერმინისტრობის კანდიდატმა, გიორგი გახარიამ უკვე წარუდგინა პარლამენტს მთავრობის შემადგენლობა, რომელსაც საკანონმდებლო ორგანომ კენჭი უნდა უყაროს. ამ ეტაპზე პარლამენტი ერთპარტიულია და მასში მხოლოდ ქართული ოცნების დეპუტატები არიან.

რამდენჯერმე გავრცელდა ინფორმაცია იმის შესახებ, რომ პრემიერსა და ჯანდაცვის მინისტრს შორის უთანხმოება იყო და შესაძლოა, ის გადაეყენებინათ, ან ახალ მთავრობის შემადგენლობაში არ წარედგინათ.

"დავემორჩილები პრემიერის გადაწყვეტილებას", — ამბობდა ტიკარაძე რამდენიმე დღის წინ, როცა ჰკითხეს, განიხილავდა თუ არა გახარია მინისტრის პოსტზე.

გახარია მინისტრებს არ ცვლის და მთავრობა პრაქტიკულად იგივე შემადგენლობით წარადგინა. ახალი ხელმძღვანელი მხოლოდ იუსტიციის სამინისტროს ეყოლება.

მინისტრობის კანდიდატებად წარდგენილნი არიან:

1. მიხეილ ჩხენკელი — განათლების, მეცნიერების, კულტურისა და სპორტის სამინისტრო;
2. ლევან დავითაშვილი — გარემოს დაცვისა და სოფლის მეურნეობის სამინისტრო;
3. ნათია თურნავა — ეკონომიკისა და მდგრადი განვითარების სამინისტრო;
4. ირაკლი ღარიბაშვილი — თავდაცვის სამინისტრო;
5. გოჩა ლორთქიფანიძე — იუსტიციის სამინისტრო;
6. ეკატერინე ტიკარაძე — ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის სამინისტრო;
7. მაია ცქიტიშვილი — რეგიონული განვითარებისა და ინფრასტრუქტურის სამინისტრო;
8. დავით ზალკალიანი — საგარეო საქმეთა სამინისტრო;
9. ივანე მაჭავარიანი — ფინანსთა სამინისტრო;
10. ვახტანგ გომელაური — შინაგან საქმეთა სამინისტრო;
11. თეა ახვლედიანი — შერიგებისა და სამოქალაქო თანასწორობის საკითხებში სახელმწიფო მინისტრის აპარატი.

რაც შეეხება სამთავრობო პროგრამას, მთავრობის ადმინისრაციაში აცხადებენ, რომ ძირითადი მიზანი იქნება პანდემიით შექმნილი კრიზისის დაძლევა, ეკონომიკის სწრაფი აღდგენა და განვითარება, თითოეული მოქალაქისათვის სტაბილური და უსაფრთხო გარემოს შექმნა, სტრუქტურული რეფორმების გაგრძელება.

"პარალელურად, ქვეყანა გააგრძელებს დემოკრატიის კონსოლიდაციისკენ ნაბიჯების გადადგმას და საგარეო ასპარეზზე ევროპული და ევროატლანტიკური ინტეგრაციისკენ სწრაფვას. შემდგომი წლების ძირითადი ამოცანა იქნება ქვეყნის ინსტიტუციური, ეკონომიკური და სოციალური მომზადება 2024 წელს ევროკავშირის სრულფასოვანი წევრობისთვის განაცხადის გაკეთებისთვის", — აცხადებენ მთავრობის ადმინისტრაციაში.

მათივე ინფორმაციით, მთავრობის ძალისხმევა მიმართული იქნება შემდეგ ოთხ საკვანძო მიმართულებაზე:

• საგარეო პოლიტიკა, უსაფრთხოება, კონფლიქტის მოგვარება და ადამიანის უფლებები;
• ეკონომიკური განვითარება;
• სოციალური პოლიტიკა და ადამიანური კაპიტალის განვითარება;
• სახელმწიფო მმართველობა.

მინისტრობის კანდიდატებს ერთპარტიულ პარლამენტში მომავალ კვირას მოუსმენენ. სწორედ ამის შემდეგ უნდა დაამტკიცოს ქართული ოცნების გუნდმა ქართული ოცნებისვე მინისტრები.