ქართული ოცნების ერთ-ერთი ლიდერის, გია ვოლსკის განცხადებით, მოლაპარაკებების გარშემო ოპონენტების მხრიდან ასეთი "ხისტი" და "ხეპრული" განცხადებები მიუღებელია. ამის შესახებ მან რუსთავი2-ის ეთერში ისაუბრა.

"ჩემი პოზიცია მინდა დავაფიქსირო რასაც ჰქვია მოლაპარაკებების პროცესი, თვითონ კლასიკური გაგებით მოლაპარაკებების პროცესის გარშემო, ასეთი ხისტი და ხეპრული განცხადებები ოპონენტების მხრიდან მიღებული არ არის, აქედან გამომდინარე, დააკვირდით ვინც უფრო ხისტია, უფრო რევოლუციური მოწოდებებისკენ არის ორიენტირებული. არიან ადამიანების გარკვეული ჯგუფი, ძირითადად ნაციონალური მოძრაობის გარშემო, ან პირველი ოცეული ნახეთ, სალომე სამადაშვილს ნამდვილად არ გავიმეორებ, მაგრამ ეს სიის შემადგენლობა არის ეკლექტურიც, ამ რევოლუციურ პროცესებზე ორიენტირებულიც", — განაცხადა ვოლსკიმ.

საქართველოში აშშ-ის ელჩის, კელი დეგნანის რეზიდენციაში ხელისუფლების წარმომადგენლებსა და ოპოზიციას შორის საარჩევნო საკითხთან დაკავშირებით მოლაპარაკების მესამე რაუნდი გაიმართა. შეხვედრას, რომელიც ცოტა ხნის წინ დაიწყო, ესწრებიან ფასილიტატორი ელჩები. ქართული ოცნების მხრიდან, პარტიის აღმასრულებელი მდივანი ირაკლი კობახიძე ესწრება.

ოპოზიცია 31 ოქტომბერს ჩატარებული არჩევნების შედეგებს არ აღიარებს. მათ საპარლამენტო მანდატებზე უარი უკვე თქვეს და ბოიკოტი გამოუცხადეს არჩევნების მეორე ტურსაც, რომელიც 21 ნოემბერს ჩატარდა. მასში არცერთი ოპოზიციური პარტია მონაწილეობდა. 17 მაჟორიტარულ ოლქის გარდა, მეორე ტური გაიმართა ქუთაისის მერობის არჩევნებზეც. როგორც მოსალოდნელი, ოპოზიციის გარეშე ჩატარებულ არჩევნებში, სახელისუფლებო პარტიამ გაიმარჯვა.

მეორე ტური მიმდინარეობდა იმ ვითარების ფონზეც, რომ პოლიტიკური კრიზისიდან გამოსავლის საპოვნელად აშშ-სა და ევროკავშირის ელჩების შუამავლობით მმართველი პარტიისა და ოპოზიცურ პარტიებს შორის მოლაპარაკებები მიმდინარეობს. ოპოზიციაში აცხადებენ, რომ მათი მოთხოვნები არ იცვლება და რიგგარეშე არჩევნებს მოითხოვენ. თავისი პოზიციების დათმობაზე უარს ამბობს ხელისუფლებაც. როგორც ქართულ ოცნებაში განმარტავენ, რიგგარეშე არჩევნების ჩატარებას არც განიხილავენ.

აშშ-ის და ევროკავშირის საელჩო ოპოზიციას მოუწოდებენ, პარლამენტში შევიდნენ, ვინაიდან მათთვის ერთპარტიული პარლამენტი მიუღებელია. ამ ეტაპზე მოლაპარაკებების მესამე რაუნდის მოლოდინია.