საქართველო აშშ-ის 45-ე პრეზიდენტის, დონალდ ტრამპის ადმინისტრაციასთან აქტიურად ითანამშრომლებს. ამის შესახებ საქართველოს პრემიერ მინისტრმა გიორგი კვირიკაშვილმა დღეს მთავრობის სხდომაზე განაცხადა. მისი თქმით, აშშ იყო და მომავალშიც იქნება საქართველოს უმნიშვნელოვანესი პარტნიორი.

"ძლიერი ამერიკა არის უმნიშვნელოვანესი, მსოფლიოში მშვიდობისა და სტაბილურობისთვის. საქართველო იყო და რჩება აშშ-ის ერთგულ და მნიშვნელოვან პარტნიორად რეგიონში. ჩვენ გვაქვს ინსტიტუციონალიზებული სტრატეგიული ურთიერთობის ფორმატი , რომელიც მოიცავს არაერთ მიმართულებას - თავდაცვა და უსაფრთხოება, ეკონომიკა, ვაჭრობა, ენერგეტიკა, დემოკრატიის კონსოლიდაცია ქვეყანაში და დემოკრატიის განვითარება და ხალხთაშორისი ურთიერთობები. ამ ქარტიის ფარგლებში საქართველო გააგრძელებს ძალიან აქტიურ თანამშრომლობას აშშ-სთან იმისათვის, რომ ორმხრივად ხელსაყრელი შედეგები მივიღოთ. ძალიან დიდი იმედი გვაქვს ამ თანამშრომლობის დადებითი შედეგების. საქართველო დამოუკიდებლობის მოპოვების პირველი დღიდან აშშ იყო და დღემდე არის საქართველოს სუვერენიტეტის და ტერიტორიული მთლიანობის ძალიან ძლიერი მხარდამჭერი და ჩვენი უმნიშვნელოვანესი პარტნიორი. ჩვენ დიდი იმედი გვაქვს, რომ ეს პარტნიორობა კიდე უფრო გაღრმავდება,"- აღნიშნა პრემიერ-მინისტრმა.