ევროპული საქართველოს ერთ-ერთი ლიდერის, გიგი უგულავას თქმით, ოპოზიცია პარლამენტის წინ, ხალხმრავალ საპროტეტსო აქციას, მისი ტრადიციული გაგებით, არ გეგმავს. ამის შესახებ მან ლელოს ოფისში სხვა პარტიებთან შეხვედრის დასრულების შემდეგ განაცხადა.

"ჩვენ განვიხილეთ უკვე რამდენიმე იდეა და ჩვენი გეგმების შესახებ უფრო სრულად ვისაუბრებთ ხვალ. ერთი, რაც დადასტურებით შემიძლია ვთქვა და რაზეც საერთო კონსესუსი არსებობს, პარლამენტის წინ ხალხმრავალი აქცია არ იგეგმება. ეს შემიძლია, დღეს დავადასტურო. დეტალები რა და როგორ იქნება, ეს უკვე ხვალ", — განაცხადა უგულავამ.

უგულავამ აღნიშნა ისიც, რომ ოპოზიცია სხვადასხვა სფეროს წარმომადგენლებთანაც გეგმავს შეხვედრას, მათ შორის, ბიზნეს სექტორთანაც. როგორც მან განმარტა, საუბრის 2 ძირითადი თემა ექნებათ. კერძოდ, რას ეფუძნება ოპოზიციის გადაწყვეტილება არ შევიდეს პარლამენტში და კოვიდრეგულაციები.

მისივე თქმით, რას გეგმავს ოპოზიცია პარლამენტის პირველ სხდომაზე, ამის დეტალებზე ისინი ხვალ ლეიბორისტული პარტიის ოფისში 2 საათზე იმსჯელებენ.

საქართველოს საპარლამენტო არჩევნები 31 ოქტომბერს ჩატარდა. ოპოზიციამ შედეგები ლეგიტიმურად არ სცნო, საკუთარ მანდატებზე უარი თქვა და 21 ნოემბერს გამართულ მეორე ტურში მონაწილეობა არ მიიღო. მათ მმართველ პარტიას სამი ძირითადი მოთხოვნა წამოუწყენეს, კერძოდ, ახალი არჩევნები, პოლიტპატიმრების გათავისუფლება და ცესკოს თავმჯდომარის, თამარ ჟვანიას თანამდებობიდან გადაყენება. ამასთან დაკავშირებით რამდენჯერმე აქციაც მოაწყვეს. მათ შორის 8 ნოემბერს ცესკოს ცენტრალურ შენობასთან, რომელიც პოლიციამ წყლის ჭავლის გამოყენებით დაშალა.