ევროპული საქართველოს ლიდერი, გიგი უგულავა ამბობს, რომ მეორე ტურის მიმართ საზოგადოებისა და ოპოზიციის ყველაზე სწორი რეაქცია იგნორია. სწორედ ამიტომ, ოპოზიცია არჩევნების მეორე ტურის დღეს საპროტესტო აქციებს აუქმებს.

რამდენიმე დღის განმავლობაში ოპოზიციის წარმომადგენლები აცხადებდნენ, რომ არჩევნების მეორე ტურის დღეს საპროტესტო ღონისძიებებს გეგმავდნენ. აქციის ფორმებთან დაკავშირებით ოპოზიციის ლიდერები ლელოს ოფისში რამდენიმე დღის განმავლობაში მსჯელობდნენ.

"ჩვენ ვაცნობიერებთ იმას, რომ ეს მეორე ტური არის თავიდან ბოლომდე ფიქცია იმისათვის, რომ "გაიპრავოს" ივანიშვილმა 31-ში ჩადენილი ძალადობა და გაყალბება. ამიტომ, საზოგადოების ყველაზე სწორი რეაქცია ამასთან დაკავშირებით ისევე, როგორც მთელი ოპოზიციური სპექტრის, არის იგნორი, იგნორი და მხოლოდ იგნორი", — განაცხადა უგულავამ.

მან მიმართა ოპოზიციურად განწყობილ ადამიანებს და მოუწოდა, რომ არჩევნებში მონაწილეობა არ მიიღონ.

საპარლამენტო არჩევნების მეორე ტური 21 ნოემბერს გაიმართება. ოპოზიცია პირველი ტურის შედეგებს არ აღიარებს, არც მეორე ტურში აპირებს მონაწილეობას და არც პარლამენტში გეგმავს შესვლას.

შედეგების გასაპროტესტებლად მათ რამდენიმე აქცია მოაწყვეს რუსთაველზე და ცენტრალური საარჩევნო კომისიის შენობასთან. მოქალაქეები იკრიბებოდნენ საოლქო კომისიებთანაც.

პოლიტიკური კრიზისიდან გამოსავლის საპოვნელად აშშ-სა და ევროკავშირის ელჩების შუამავლობით მმართველი პარტიისა და ოპოზიცურ პარტიებს შორის მოლაპარაკებები დაიწყო. ოპოზიციაში აცხადებენ, რომ მათი მოთხოვნები არ იცვლება და რიგგარეშე არჩევნებს მოითხოვენ. თავისი პოზიციების დათმობაზე უარს ამბობს ხელისუფლებაც. როგორც ქართულ ოცნებაში ამბობენ რიგგარეშე არჩევნების ჩატარებას არც განიხილავენ.