ნოდარ და ლევან შუკაკიძეების, რომლებსაც ნიკა მელია საკუთარი შტაბის დაწვაში ბრალს სდებს, ადვოკატებმა განაცხადეს, რომ მელიას ბრალდება დაუსაბუთებელია.

"9 წლიანი რეჟიმის დროს ბევრი ადამიანი განაწყენდა. არ გამოვრიცხავთ, ან თვითონ დაგეგმეს ეს თავდასხმა, ან მათზე განაწყენებულმა პირმა ჩაიდინა", — განაცხადეს ადვოკატებმა.

როგორც ერთ-ერთმა ადვოკატმა აღნიშნა, ასე ფიქრის საფუძველს თავად მელიას დაუსაბუთებელი ბრალდება აძლევს — როგორც მელიამ უარგუმენტოდ დაადანაშაულა შუკაკიძეები, ისევე, ფიქრობენ თავად, რომ ენმ-მ თვითონ დაგეგმა შტაბზე თავდასხმა.

ერთიანი ნაციონალური მოძრაობის ერთ-ერთი ლიდერის ნიკა მელიას თქმით, ის იწყებს ბრძოლას არა მხოლოდ ხმის ქურდებზე, არამედ მათთან გარიგებაში მყოფ ე.წ ქურდებზეც, რომლებმაც მისი შტაბი დაწვეს. ამის შესახებ ის სოციალურ ქსელში დაწერა.

"არჩევანს მარტო არჩევნების დღეს არ აკეთებ ადამიანი. არჩევანს აკეთებ შემდეგაც — ან იბრძვი შენს მიერ გაკეთებული არჩევანის დასაცავად, რომელიც მოგპარეს, ან ეგუები მის ასე უტიფრად და უსინდისოდ მოპარვას და ამ შეგუებით დანაშაულის თანამონაწილე ხდები. დღეიდან, მე ვებრძვი როგორც ხმის ქურდებს, ისე, მათთან ბინძურ გარიგებაში მყოფ ე.წ. "ქურდებს". სწორედ მათ და სხვამ არავინ გადაწვეს ჩემი შტაბი.

რა ფოკუსებიც არ უნდა ატაროს ყალბისმქმნელმა რეჟიმმა, ყველამ იცის და მათაც —კალაძე კობიაშვილმა და მათმა "შნირებმაც" — ე.წ. კანონიერმა ქურდმა ნოდარ შუკაკიძემ, იგივე ნოდო გლდანსკიმ, რომელიც საბერძნეთში იხდის სასჯელს და მისმა აქ მყოფმა ოცნების პარტიულმა კორდინატორმა ძმამაც კარგად იციან რა მწარედაც წააგეს ბრძოლა გლდანში და ეს გადაწვა სხვა არაფერი იყო თუ არა მარცხისგან ისტერიკაში ჩავარდნილი ბოღმის ამოფრქვა - პირდაპირი მნიშვნელობით ცეცხლად ამოფრქვევა.
ხმის ქურდებსაც და მათ "ქურდულ" "შაიკასაც" — აუცილებლად მოუწევთ პასუხისგება იმაზე რაც ჩაიდინეს. ვერსად დაიმალებიან, თუ რა თქმა უნდა, მიწა პირს არ იზამს და თან არ ჩაიტანს. ამ ქვეყანას არავის გავათელინებთ...", — წერს ნიკა მელია.

ერთიანი ნაციონალური მოძრაობის ინფორმაციით, 16 ნოემბერს გლდანში ნიკა მელიას შტაბზე თავდასხმა მოხდა. როგორც On.ge-ს მელიას შტაბის წევრმა განუცხადა, ოფისს ქვები და, სავარაუდოდ, ე.წ მოლოტოვის კოქტეილები ესროლეს. დამწვარია ოფისის ავეჯი.

ამავე დღეს ქვები ესროლეს ბათუმში ნაციონალური მოძრაობის შტაბს. როგორც ენმ-ის ერთ-ერთმა ლიდერმა, მირდატ ქამადაძემ განაცხადა, ეს არის ერთობილი შტევა ენმ-ზე ქართული ოცნების მხრიდან.