ევროპული საქართველო არჩევნების დღეს ნაციონალური მოძრაობის მიერ დაანონსებული სირცხვილის დერეფნების მოწყობაში მონაწილეობას არ მიიღებს. ამის შესახებ პარტიის ერთ-ერთმა ლიდერმა, გიგა ბოკერიამ, TV პირველის ეთერში ისაუბრა.

"ნაციონალურ მოძრაობას გადაუწყვეტია, სირცხვილის კორიდორები გააკეთოს. ჩვენ არ ვიღებთ მონაწილეობას და ამ ტიპის პროტესტი შეცდომად მიმაჩნია. არა იმიტომ, რომ უფლება არ აქვთ, არასწორად მიგვაჩნია. ამაშიც განვხსვავდებით. თუკი ასეთი ხალხი არსებობს და ცოტაა ასეთი ხალხი, ვინც ქართული ოცნების გულწრფელი მხარდამჭერია, მათთვის ფიზიკურად ან თუნდაც ვერბალურად ხელის შეშლა, მომგებიან პიარს აკეთებინებს მთავრობას", — ამბობს ბოკერია.

საქართველოში საპარლამენტო არჩევნების მეორე ტური 21 ნოემბერსაა დანიშნული. ოპოზიცია მასში არ მონაწილეობს, რადგან 31 ოქტომბერს ჩატარებული არჩევნების შედეგებს არ აღიარებს. მათ საპარლამენტო მანდატებზე უარი უკვე თქვეს. რიგგარეშე არჩევნების მოთხოვნით, ოპოზიციის წარმომადგენლები საპროტესტო აქციებს მართავენ.

15 ნოემბერს ბათუმში გამართულ საპროტესტო აქციაზე ნაციონალური მოძრაობის წევრმა, ლევან ვარშალომიძემ მხარდამჭერებს მოუწოდა, რომ 21 ნოემბერს საარჩევნო უბნებთან სირცხვილის დერეფნები გააკეთონ. მისი ეს პოზიცია გააკრიტიკეს პარტიის ლიდერებმა, ხატია დეკანოიძემ და სალომე სამადაშვილმა. ამ იდეას არ იზიარებენ არც ოპოზიციურ ერთობაში შემავალი სხვა პარტიები.