მიხეილ სააკაშვილი საკუთარ ფეისბუქგვერდზე ლაივით ჩაერთო და კითხვებს უპასუხა. როგორც თავად აღნიშნა, ლოზუნგები, სადაც მისი ჩამოსვლის მოწოდებაა, სუს-სა და ბიძინა ივანიშვილის ლოზუნგია.

"არაფერი არ გამოვა, სანამ მიშა არ ჩამოვა — არ არის სუს-ს და ივანიშვილის ლოზუნგი", — განაცხადა მიხეილ სააკაშვილმა.

ასევე, ლაივისას მიწერეს — "თქვენ თუ გადაგვარჩენთ", რაზეც სააკაშვილმა უპასუხა, რომ აღარ უნდოდა ეს მესიჯები, რადგან ესეც სუს-ს გზავნილი იყო.

მადლობა გადაუხადა იმ ადამიანებს, ვისაც მისი მხარდამჭერი პლაკატები უჭირავს, მაგრამ უპასუხა, რომ "სააკაშვილით საკითხი არ წყდება".

აღსანიშნავია, რომ დღეს ბათუმში მიმდინარე ოპოზიციის აქცია პარტია მოქალაქეების წევრებმა დატოვეს. როგორც პარტიის ერთ-ერთი წევრი, გენრი დოლიძე აღნიშნავს, აქციას ერთადერთი ლოზუნგითა და მიზნით უერთდებიან — ჩატარდეს განმეორებითი არჩევნები სამართლიანი ცესკოს პირობებში.

"ჩვენ აქციას ვუერთდებით ერთადერთი ლოზუნგითა და მიზნით, შესაბამისად, ნებისმიერი სხვა ვიწრო პარტიული ლოზუნგის ქვეშ ჩატარებულ აქციაზე ჩვენ ვერ დავდგებით, ბუნებრივია. თუმცა, ეს იმას არ ნიშნავს, რომ ჩვენ შორის ოპოზიციაში არის რაიმე დიდი განხეთქილება", — განაცხადა გენრი დოლიძემ.

ბათუმში ოპოზიციის აქცია პირველად პარტია ლელოს წარმომადგენლებმა დატოვეს. TV პირველის ინფორმაციით, ამის მიზეზი გახდა ის, რომ აქციის მონაწილეებს საქართველოს ექსპრეზიდენტ მიხეილ სააკაშვილთან დაკავშირებული ბანერები ეჭირათ, წარწერით — "მიშა ჩამოდი".

პარტიის ერთ-ერთმა ლიდერმა ბადრი ჯაფარიძემ, TV პირველთან საუბრისას განაცხადა, რომ ლოზუნგები, რომელიც არ ეხება ოპოზიციის საერთო მოთხოვნას ხელახალი არჩევნების ჩატარებასთან დაკავშირებით, ამომრჩეველში დაბნეულობას იწვევს.

"სხვადასხვა ოპოზიცური პარტია ვიკრიბებით იმ მოთხოვნით, რომ ჩატარდეს ახალი არჩევნები და ამ ერთობლივი მანიფესტაციების მიზანი და მიზეზი არის ის, რომ ჩატარდა არჩევნები, რომელიც გაყალბდა. ჩვენ ერთობლივად ვაპროტესტებთ ამ ფაქტს და ვითხოვთ ახალი არჩევნების ჩატარებას. სხვა მოთხოვნები, რომელიც შეიძლება, ჰქონდეს ნაციონალურ მოძრაობას და არავის არა აქვს უფლება, რომ შეუზღუდოს მათ ეს მოთხოვნა, მაგრამ ალბათ ცალკე აქცია უნდა ჩატარდეს ამისათვის. იმიტომ, რომ მაშინ ეს გაუგებრობას იწვევს ყველასთვის ვინც ამ აქციას აკვირდება, იმიტომ, რომ აღარ არის ნათელი რა არის ოპოზიციების გაერთიანებული მიტინგების მიზანი", — განაცხადა ჯაფარიძემ.

ოპოზიცია მორიგ აქცის აჭარაში მართავს. ისინი ამბობენ, რომ გაჩერებას არ აპირებენ და აქციებს პერმანენტულად აანონსებენ. როგორც დღეს ევროპული საქართველოს ერთ-ერთმა ლიდერმა, გიგი უგულავამ განაცხადა, ოპოზიცია აპირებს, რომ ამერიკის შეერთებული შტატების სახელმწიფო მდივნის, მაიკ პომპეოს ვიზიტის პარალელურად, 18 ნოემბერს "მდუმარე" აქცია მოაწყოს.