გრიგოლ ვაშაძის განცხადებით, იმ შემთვევაში, თუ ხელახალი არჩევნები დაინიშნება, დიდი ალბათობით, მონაწილეობას არ მიიღებს. ამის შესახებ ვაშაძემ TV პირველის ეთერში ისაუბრა.

"დიდი ალბათობით, არ მივიღებ მონაწილეობას, არ მაქვს გადაწყვეტილი. რაღაც თავი ცხოვრებაში იწყება, რაღაც თავი მთავრდება, გადაწყვეტილად არ მითქვამს, დიდი ალბათობით, არა. რომ გითხრათ, ვაპირებ, 30 წელი ვიბალახო ამ მოედანზე, როგორც ზოგიერთები აკეთებენ და ერთი პარტიიდან მეორეში ვირბინო და ასე შემდეგ, ნამდვილად არ მაქვს ამის სურვილი. ვნახოთ, მომავალი რას მოიტანს. სტანსილავ ეჟი ლეცს აქვს გამოთქმა, რომელიც ბევრზეა — ისე მტკიცედ ეჭირა დროშის ტარი ხელში, ვერ გაიგეს, დროშა როდის გამოცვალეს", — განაცხადა გრიგოლ ვაშაძემ.

რაც შეეხება იმას, შევა თუ არა ვაშაძე პარლამენტში, თუ მისი თანაპარტიელები ამას გადაწყვეტენ, განაცხადა, რომ არ შევა.

"არა, ვერ ვიქნები იმიტომ, რომ მე იმ ორგანიზაციასთან, ქუთაისის ორგანიზაციასთან, რომელთანაც 2017 წლიდან გავატარე იმაზე მეტი დრო, ვიდრე თბილისში ვინმესთან, თავიდანვე მოვილაპარაკეთ, რომ ვიგებთ მაჟორიტარულ არჩევნებს —– შევდივართ; ვერ ვიგებთ — მე სიით პარლამენტში არ შევალ", — აღნიშნა გრიგოლ ვაშაძემ.

ოპოზიცია 31 ოქტომბერს ჩატარებული არჩევნების შედეგებს არ აღიარებს. მათ საპარლამენტო მანდატებზე უარი უკვე თქვეს. ხელახალი არჩევნების მოთხოვნით, ოპოზიციის წარმომადგენლები საპროტესტო აქციებს მართავენ. მომდევნო აქცია რუსთაველის გამზირზე ხვალ, 14 ნოემბერსაა დაგეგმილი.

გაპროტესტებული არჩევნების შედეგბთან დაკავშირებით პოლიტიკური პარტიის ლიდერები აშშ-ს ელჩს, კელი დეგნანს შეხვდნენ. შეხვედრას ოპოზიციურ პარტიებთან ერთად ქართული ოცნებიდან, პარლამენტის თავმჯდომარე, არჩილ თალაკვაძეც ესწრებოდა. შეხვედრიდან პირველი, ლეიბორისტული პარტიის ლიდერი, შალვა ნათელაშვილი გამოვიდა, რომელმაც თქვა, რომ ოპოზიცია ისევ ერთიანია, მოთხოვნები კი უცვლელი. იგივენაირი შეფასებები ჰქონდათ ოპოზიციის სხვა ლიდერებსაც. პარტია მოქალაქეების ლიდერმა, ალეკო ელისაშვილმა განაცხადა, რომ შეხვედრა არ ნიშნავს, რომ მოლაპარაკებები აუცილებლად შეთანხმებით დასრულდება. რაც შეეხება, არჩილ თალაკვაძეს მან შეხვედრა "პოზიტიურად" შეაფასა და აღნიშნა, რომ დიალოგის დაწყება პოზიციების დაახლოებას ემსახურება.