ვაკე-საბურთალოს საოლქო საარჩევნო კომისიასთან ოპოზიციის გაერთიანებული ფრთის აქცია მიმდინარეობს. როგორც აქციის მონაწილეები აცხადებენ, ამ წუთებში საოლქოში შემაჯამებელი ოქმების დამტკიცება ხდება, რასაც უნდობლობას უცხადებენ. შენობასთან საპატრულო პოლიციის თანამშრომლებიც არიან მობილიზებულნი.

"უნდობლობას ვუცხადებთ იმ პროცესს, რაც ახლა აქ ხდება. დღეს ამ შენობაში ყალბდება საქართველოს მომავალი, რასაც ვაპროტესტებთ. უნდა დაინიშნოს ცესკოს ახალი ხელმძღვანელი და სამართლიანად მოხდეს ხმების დათვლა", — განაცხადა აქციის ერთ-ერთმა მონაწილემ.

31 ოქტომბრის საპარლამენტო არჩევნების შედეგებს ოპოზიცია არ აღიარებს. ბარიერგადალახულმა რვავე პარტიამ პარლამენტში შესვლაზე უარი განაცხადა. გარდა ამისა, ისინი მეორე ტურებში მონაწილეობაზეც უარს ამბობენ, რომელიც 17 ოლქში გაიმართება.

პატრიოტთა ალიანსის გარდა, პარტიები ერთობლივ საპროტესტო აქციებს აწყობენ. ისინი მოითხოვენ, რომ ცენტრალური საარჩევნო კომისიის ახალი ადმინისტრაციის პირობებში ხელახალი არჩევნები ჩატარდეს.

ოპოზიციის ბრალდებებს უარყოფენ ქართულ ოცნებაში. როგორც მმართველ პარტიაში აცხადებენ, ისინი მზად არიან დიალოგისთვის, თუ ოპოზიცია არჩევნების შედეგებს პატივს სცემს.

ქართული ოცნების გენერალურმა მდივანმა და თბილისის მერმა, კახა კალაძემ მოუწოდა პოლიტიკურ პარტიებს, რომ ქუჩის ნაცვლად პროცესმა მოლაპარაკებების პროცესში გადაინაცვლოს და ამაში საერთაშორისო პარტნიორებიც ჩაერთონ.