ქართული ოცნების აღმასრულებელი მდივნის, ირაკლი კობახიძის თქმით, ოპოზიციურ პარტიებს რამდენიმე მილიონი აქვთ დახარჯული წინასაარჩევნოდ, ამიტომ მათ პირდაპირ ინტერესშია, რომ პარლამენტში შევიდნენ.

"გარდა იმისა, რომ პარტიებს აქვთ განსხვავებული პოზიციები, კონკრეტული პარტიების შიგნითაც არიან ადამიანები, მაგალითად, ნაციონალურ მოძრაობაში, რომელთაც თითოეულს რამდენიმე მილიონი აქვს დახარჯული. არის უამრავი განსხვავებული ინტერესი, რომელიც ფულის ხარჯვასთანაც არის დაკავშირებული, რეალობის აღქმასთანაც, რაც საბოლოო ჯამში ამ ადამიანებს უბიძგებს, რომ შემოვიდნენ პარლამენტში", — განაცხადა ირაკლი კობახიძემ.

კობახიძის თქმით, რაც შეეხება ულტიმატუმს, რომ ჯერ უნდა დაინიშნოს ხელახალი არჩევნები და მერე დასხდებიან მოლაპარაკების მაგიდასთან, ეს არის არასწორი საუბარი როგორც საზოგადოების მიმართ და საერთაშორისო პარტნიორების მიმართ. კობახიძემ აღნიშნა, რომ ოპოზიციამ უნდა შეიცვალოს საკუთარი მიდგომა, ხოლო ხელისუფლება მუშაობს იმაზე, რომ ოპოზიცია სწორ გზაზე დააყენოს.