აშშ-ს საპრეზიდენტო არჩევნებზე ხმების დათვლა გრძელდება. ამ ეტაპისთვის ამომრჩევლებისა და კოლეგიის ხმებითაც ჯო ბაიდენი ლიდერობს.

წინასწარი მონაცემებით, ჯო ბაიდენს 69 მილიონზე მეტმა ამერიკელმა უკვე დაუჭირა მხარი, ხოლო დონალდ ტრამპს — 67 მილიონზე მეტმა. ხმების დათვლა ჯერ კიდევ გრძელდება, ამიტომ რიცხვები შეიცვლება. რაც შეეხება საარჩევნო კოლეგიას, პირველადი მონაცემებით, დემოკრატ კანდიდატს უკვე 224 ხმა აქვს მოპოვებული, ხოლო რესპუბლიკელს — 213.

ბოლო რამდენიმე შტატში ბიულეტენების დათვლა კანდიდატებისთვის გადამწყვეტი იქნება. ახლახან ბაიდენი პირველად დაწინაურდა მიჩიგანის შტატში. ანალიტიკოსები ფიქრობენ, რომ გამარჯვების ხაზი სწორედ ამ შტატზე გავა. ამიტომ შეუძლებელია იწინასწარმეტყველო ვინ გახდება პრეზიდენტი.

როდის გავიგებთ გამარჯვებულის ვინაობას, უცნობია. ხმების დათვლის დასრულებამდე რამდენიმე საათით ადრე მოქმედმა პრეზიდენტმა, დონალდ ტრამპმა საკუთარი თავი გამარჯვებულად უკვე გამოაცხადა. გარდა ამისა, მტკიცებულებების წარმოდგენის გარეშე მიმდინარე ხმის დათვლის პროცესი, როგორც "უდიდესი თაღლითობა" შეაფასა.

"ეს სირცხვილია ჩვენი ქვეყნისთვის. უზენაეს სასამართლოს მივმართავთ, ჩვენ გვინდა, რომ ხმის მიცემა შეწყდეს. ჩვენ არ გვსურს, რომ რაღაც ბიულეტენები დილის ოთხი საათისთვის იპოვონ და ეს ხმები შედეგებს დაუმატონ", — განაცხადა ტრამპმა.

ამ განცხადების გამო დონალდ ტრამპი გააკრიტიკეს როგორც თანაპარტიელებმა, ისე ოპონენტებმა. რამდენიმე რესპუბლიკელმა ტრამპის კომენტარების გამო შეშფოთება გამოთქვა. ნიუ-ჯერსის ყოფილმა გუბერნატორმა და ტრამპის მრჩეველმა, კრის კრისტიმ პრეზიდენტის გამოსვლას არასწორი ნაბიჯი უწოდა. ყოფილმა რესპუბლიკელმა სენატორმა პენსილვანიიდან, რიკ სონტორმა აღნიშნა, რომ სიტყვა "თაღლითობის" გამოყენება არასწორია.

დემოკრატმა კონგრესმენმა ალექსანდრია ოკასიო-კორტესიმა ტრამპის განცხადებას უკანონო, საშიში და ავტორიტარული უწოდა.

აშშ არჩევნებთან დაკავშირებულ სიახლეებს LIVE რეჟიმში გაეცანით აქ. ასევე, ადევნეთ თვალი On.ge-ს ინტერაქტიულ რუკას.