ცესკოსთან მოძრაობამ შეცვალე აქცია გამართა. მათი მთავარი მოთხოვნა არის ის, რომ არჩევნების შედეგები გაუქმდეს და ცენტრალური საარჩევნო კომისიის თავმჯდომარის, თამარ ჟვანიას პასუხისმგებლობის საკითხი დადგეს.

"ჩვენი მთავარი მოთხოვნა არის, რომ არ იყოს ცნობილი არჩევნების ის შედეგები, რაც დაიდო და თამარ ჟვანია აუცილებლად ამისთვის პასუხს აგებს. პროტესტი იქნება ყოველდღიური, პერმანენტული მანამ სანამ ჩვენი მოთხოვნები არ დაკმაყოფილდება", — განაცხადა მოძრაობა შეცვალეს აქტივისტმა, ნიკა ფარულავამ.

ფარულავას განცხადებით, ცენტრალური საარჩევნო კომისია იმის მაგივრად, რომ არჩევნებს სამართლიან გარემოში ატარებდეს, "გაყალბების ბიუროდ" იქცა.

"ცენტრალური საარჩევნო კომისია იმის მაგივრად, რომ სამართლიან გარემოში ატარებდეს არჩევნებს, ხმებს ითვლიდეს ადეკვატურად, ისინი იქცნენ გაყალბების ბიუროდ. აკეთებენ იმას, რაც სურს ბიძინა ივანიშვილს. ამას აკეთებს თამარ ჟვანია. სწორედ ამიტომ თამარ ჟვანიამ უნდა იცოდეს, რომ აუცილებლად აგებს პასუხს იმ არჩევნების გამო, რომელიც ჩაატარა ივანიშვილის დაკვეთით", — განაცხადა ნიკა ფარულავამ.

31 ოქტომბრის საპარლამენტო არჩევნებში ბარიერგადალახულმა რვავე ოპოზიციურმა პარტიამ მანდატებზე უარი თქვა. ისინი პარლამენტის ლეგიტიმურობას არ აღიარებენ და ამბობენ, რომ არჩევნების დღეს გაყალბების არაერთი შემთხვევა დაფიქსირდება. ასევე, აცხადებენ, რომ გაყალბებას ცესკოს თავმჯდომარეც უწყობდა.

პარლამენტში არ შედიან ევროპული საქართველო, ლელო, ნაციონალური მოძრაობა — ძალა ერთობაშია, მოქალაქეები, სტრატეგია აღმაშენებელი, გირჩი, ლეიბორისტული პარტია და პატრიოტთა ალიანსი.

მანდატების დათმობაზე ოპოზიციის ზოგიერთი წარმომადგენელი ჯერ კიდევ 31 ოქტომბრის ღამეს საუბრობდა. ცესკოს წინასწარი მონაცემებით, ამომრჩეველთა ხმები ასე გადანაწილდა:

  • ქართული ოცნება — 48,23%;
  • ენმ — ძალა ერთობაშია — 27,16%;
  • ევროპული საქართველო — 3,78%
  • ლელო — 3,16%;
  • სტრატეგია აღმაშენებელი — 3,15%;
  • პატრიოტთა ალიანსი — 3,14%;
  • გირჩი — 2,89%;
  • მოქალაქეები — 1,33%;
  • ლეიბორისტული პარტია — 1%;

ოპოზიციური პარტიებში აცხადებენ, რომ არალეგიტიმურ პარლამენტში შესვლა არასწორი იქნება და ვადამდელი არჩევნების დანიშვნას ითხოვენ. პატრიოტთა ალიანსის გარდა, ბარიერგადალახული პარტიები ახლა საერთო აქციების გამართვას აპირებს. პატრიოტთა ალიანსში კი აცხადებენ, რომ დამოუკიდებლად იმოქმედებენ.