სახელმწიფო მდივნის პრესსპიკერის მოადგილე კეილ ბრაუნი ტვიტერზე გამოქვეყნებულ განცხადებაში ამბობს, რომ სახელმწიფო დეპარტამენტი იზიარებს ეუთოს შეფასებას. ინფორმაცია ამის შესახებ ამერიკის ხმამ გაავრცელა.

"ჩვენ ვიზიარებთ ეუთოს შეფასებას: საქართველოს საპარლამენტო არჩევნები კონკურენტული იყო და დაცული გახლდათ ფუნდამენტური თავისუფლებები, მაგრამ ბრალდებებმა ამომრჩეველზე ზეწოლის შესახებ და პარტიასა და სახელმწიფოს შორის [გამყოფი] ხაზის ბუნდოვანებამ საზოგადოების ნდობა შეამცირა. ნაკლოვანებებსა და დოკუმენტაციით გამყარებულ დარღვევებზე რეაგირება უნდა მოხდეს", — წერს ბრაუნი ტვიტერზე.

2 ნოემბრის განცხადებაში აშშ-ის ეროვნულ დემოკრატიული ინსტიტუტი აცხადებს (NDI), რომ საარჩევნო დარღვევებმა გადაფარა 31 ოქტომბრის საპარლამენტო არჩევნებამდე მიღწეული წინსვლა კანონმდებლობისა და ადმინისტრაციული პროცედურების გაუმჯობესების კუთხით. ამ დარღვევებში შედის ოქმებში არსებული უზუსტობები, ცნობები საარჩევნო უბნებზე ან მათ გარეთ დამაშინებელი ქცევის შესახებ, შედეგების დაგვიანებული გამოქვეყნება და წინასაარჩევნო პერიოდში ძალაუფლების ბოროტად გამოყენების განცდა.

ეუთო/ოდირის სადამკვირვებლო მისიის დელეგატების განცხადებით, 31 ოქტომბრის საპარლამენტო არჩევნები საქართველოში კონკურენტუნარიანი იყო და არჩევანის ფუნდამენტური თავისუფლება დაცული იყო. საერთაშორისო სადამკვირვებლო მისიის წარმომადგენლების თქმით, პანდემიის პირობებში ეფექტურად იყო მოგვარებული ტექნიკური საკითხებიც. ევროსაბჭოს საპარლამენტო ასამბლეის (PACE) სადამკვირვებლო მისიის ხელმძღვანელის, ტინი კოქსის შეფასებით, ამ არჩევნებით საქართველომ აჩვენა რომ არჩევნების ჩატარება პანდემიის პირობებშიცაა შესაძლებელი. თუმცა, მისივე თქმით, წინასაარჩევნო გარემო არ იყო ჯანსაღი, რაც არჩევნების შედეგზე საბოლოოდ ნეგატიურ კვალს ტოვებს.