ევროპული საქართველოს ლიდერი, გიგი უგულავა ამბობს, რომ "საკუთარი ტელევიზიებით" გამოცხადებლ ეგზიტპოლებზე ზეიმი "აბსოლუტურად არასერიოზულია". მისივე თქმით, არასერიოზული იყო, ასევე, ქართული ოცნების ლიდერის, ბიძინა ივანიშვილის გამოჩენა. უგულავას განცხადებით, იგი "ხაშლამასავით ჩამოატარეს ორი წუთი და გააქანეს".

"გავიგეთ, რომ ბატონ ივანიშვილს კოვიდის ეშინია. ზუსტად კოვიდის რომ ეშინია საზოგადოებას, ამისთვის სწორედ უნდა წავიდეს ეს მთავრობა, იმიტომ, რომ მათ ჩააფლავეს პანდემიასთან, უმუშევრობასთან და კრიმინალთან ბრძოლა. ჩვენ უნდა გავუფრთხილდეთ თითოეულ ხმას, რომელიც ჩვენმა ამომრჩეველმა გვარგუნა. მოვუწოდებ ყველა კომისიის წვერს და დამკვირვებელს, თითოეულ ხმას აქვს ოქროს ფასი", — ამბობს უგულავა.

უგულავა, ასევე, ამბობს, რომ მათივე ეგზიტპოლის მიხედვით, პარტიას, დაახლოებით, 10 პროცენტიანი შედეგი აქვს.

"ჯერ ზუგდიდზე ვერ ვისაუბრებ, მაგრამ მაღალი ალბათობით, ზუგდიდელებმა მე მომანიჭეს ის პრივილეგია, რომ დავამარცხო ქართული ოცნების კანდიდატი მეორე ტურში. ამავე დროს, ხვალიდან მნიშვნელოვანი ახალი ეტაპი იწყება. ჩვენ ვნახეთ, რომ არა აქვს 50 პროცენტი ივანიშვილს. ახლა ყველამ პერსონალური და პირადი ამბიცია გვერდზე უნდა გადავდოთ და რაც გვაკავშირებს საერთო, მიუხედავად განსხვავევებისა, საერთო მიზანი არის ბიძინა ივანიშვილის არჩევნებით ჩამოცილება", — აღნიშნა უგულავამ.

ეგზიტპოლების შესახებ

არჩევნების დღეს ეგზიტპოლები დამოუკიდებელმა ორგანიზაციებმა, მედიებმა და ISFED-მა ჩაატარეს. მათი შედეგები 8 საათზე გავრცელდა.

  • წელს არჩევნებზე ეგზიტპოლს ამერიკულ კომპანია Edison Research ტელეკომპანია ფორმულას დაკვეთით ატარებს.
  • მთავარი არხისთვის ეგზიტპოლებს ატარებს ფრანგული კომპანია IPSOS.
  • რუსთავი 2-სთვის ეგზიტპოლებს ბრიტანული კვლევითი კომპანია Survation ატარებს.
  • ტელეკომპანია იმედის დაკვეთით კი ეგზიტპოლებს ამერიკული კომპანია Public Opinion Strategies ატარებს.

არჩევნების დღეს ხმებს პარალელურად ითვლის არასამთავრობო ორგანიზაცია სამართლიანი არჩევნებისა და დემოკრატიის საერთაშორისო საზოგადოებაც (ISFED).

ედისონს საქართველოში სხვადასხვა დროს აქვს ეგზიტპოლი ჩატარებული. იუსტიციის სამინისტროს მიერ გამოქვეყნებული ინფორმაციით, IPSOS 2019 წელს ატარებდა კვლევას საქართველოში სასამართლო რეფორმების შესაფასებლად. Survation და Public Opinion Strategies კი საქართველოში ეგზიტპოლებს პირველად ატარებენ.