სამედიცინო ქსელ გორმედის დამფუძნებლის, გიორგი სვანაძის თქმით, გორთან მომხდარი ავტოავარიისას დაშავებულმა 9 მგზავრმა საავადმყოფო დატოვა. როგორც ექიმმა On.ge-ს განუცხადა, ერთი პაციენტი კი სხვა სამედიცინო კლინიკაში გადაიყვანეს.

"ერთი პაციენტი სიცოცხლესთან შეუთავსებელი ჭრილობების შედეგად გარდაიცვალა", — ამბობს გორმედის დამფუძნებელი, გიორგი სვანაძე.

ავტოავარია გორის ავტობანზე გუშინ, 29 ოქტომბერს მოხდა. შემთხვევის შედეგად 6 ადამიანი გარდაიცვალა, ხუთი ადგილზე.

შინაგან საქმეთა სამინისტროს ცნობით, მომხდართან დაკავშირებით ტრაილერის მძღოლი დააკავეს. უწყების ცნობით, გამოძიებით დადგინდა რომ თბილისი-სენაკი-ლესელიძის საავტომობილო გზის 77-ე კილომეტრზე, დასავლეთის მიმართულებით, თურქული სანომრე ნიშნებით მოძრავი სატვირთო ავტომანქანა "დაფი" სამგზავრო მიკროავტობუსს შეეჯახა.

უწყების ინფორმაციით, საქმეზე გამოძიება საქართველოს სისხლის სამართლის კოდექსის 276-ე მუხლის მე-8 ნაწილით მიმდინარეობს, რაც ტრანსპორტის მოძრაობის უსაფრთხოების ან ექსპლუატაციის წესის დარღვევას გულისხმობს, რამაც ორი ან მეტი ადამიანის სიცოცხლის მოსპობა გამოიწვია. დანაშაული 6-დან 10 წლამდე ვადით თავისუფლების აღკვეთას ითვალისწინებს.