"არ წახვიდე, არ დამტოვო..." — ასე ეხმაურება ერთიანი ნაციონალური მოძრაობის ერთ-ერთი ლიდერი, ნიკა მელია ქართული ოცნების ერთ-ერთ ლიდერს, ირაკლი კობახიძეს, რომელმაც თქვა, რომ პოლიტიკიდან წავა, თუ გლდანში, სამგორში ან თელავში ოპოზიციის მაჟორიტარობის კანდიდატი გაიმარჯვებს.

პოსტი მელიამ Facebook-ის საკუთარ გვერდზე გამოაქვეყნა. სწორედ ის არის ოპოზიციის კანდიდატი გლდანში, ქართული ოცნებიდან კი მისი კონკურენტი ლევან კობიაშვილია.

ქართული ოცნების აღმასრულებელმა მდივანმა, ირაკლი კობახიძემ დღეს განაცხადა, რომ თუ მმართველი პარტიის სამი კანდიდატი, გლდანის, სამგორისა და თელავის ოლქებში არჩევნებს ვერ მოიგებს, იგი პოლიტიკიდან წავა. თუ საწინააღმდეგო მოხდება და სამივეში მოიგებენ, კობახიძე მთავარი არხის დირექტორს, ნიკა გვარამიას მოუწოდებს, რომ პოლიტიკიდან და მედიიდან წავიდეს.

2020 წლის 31 ოქტომბერს საქართველოში საპარლამენტო არჩევნები გაიმართება. წელს პირველად, საარჩევნო სისტემა ყველაზე მეტად მიუახლოვდა სრულად პროპორციულს და არჩევნების 120/30 მანდატების თანაფარდობით ჩატარდება. აღნიშნული 8 მარტს ოპოზიციისა და მმართველ გუნდს შორის აშშ-ს ელჩის რეზიდენციაში გამართულ არაფორმალურ შეხვედრაზე გადაწყდა. იქვე, სამთავრობო გუნდი და ოპოზიცია ასევე, შეთანხმდა, რომ პარტია, რომელიც 40%-იან მხარდაჭერას ვერ მოიპოვებს, მთავრობის დაკომპლექტებას ვერ შეძლებს. რაც შეეხება ბარიერს, იგი — 1%-ია.