ევროპული საქართველოს მაჟორიტარობის კანდიდატმა, გიგა ბოკერიამ განაცხადა, რომ ბევრი საერთაშორისო მოთამაშისთვის მთავარი კრიტერიუმი სამართლიანი არჩევნების მსგავსი ორგანიზაციებისა და საერთაშორისო ორგანიზაციების შეფასება იქნება და არა თვითონ პარტიები. აღნიშნულით ბოკერიამ თეა წულუკიანის გაკეთებულ განცხადებას უპასუხა.

"უნდა განვასხვავოთ, სამართლიანი არჩევნები არ არის პარტიებთან აფილირებული ორგანიზაცია და ამ ტიპის ორგანიზაციების და საერთაშორისო ორგანიზაციების შეფასებები იქნება ბევრი საერთაშორისო მოთამაშისთვის მთავარი კრიტერიუმი და არა თვითონ პარტიები. ეს ყოველთვის ასე იყო და თუ ვნახავთ 2018 წლის საპრეზიდენტო არჩევნების შემდეგ ოდირის მიერ გაკეთებულ დასკვნას, იქ აღწერილი ვითარება არის უმძიმესი რამ, ასეთ რთული დასკვნა საერთაშორისო სადამკვირვებლო ორგანიზაციების საქართველოში ჩატარებულ არჩევნებს შევარდნაძის დროის შემდეგ არ ჰქონია", — განაცხადა ბოკერიამ.

მისივე თქმით, არსებობს მრავალწლიანი სადამკვირვებლო ორგანიზაციები, რომლებიც არ არიან ფილირებული არცერთ პოლიტიკურ ჯგუფთან.

"ეს არის გაგძელება ამ ნიაღვარის, აბსურდის, რაც ივანიშვილის რეჟიმს და ავტორიტარულ რეჟიმებს ახასიათებთ, სხვადასხვანაირი სამოქალაქო ჯგუფები არსებობს, ზოგი მათგანი პოლიტიკური შეხედულებების მქონე არის, მაგრამ ჩვენ გვყავს ქვეყანაში მრავალწლიანი ტრადიციის სადამკვირვებლო ორგანიზაციები, რომლებიც არ არიან აფილირებული არცერთ პოლიტიკურ ჯგუფთან და იყვნენ კრიტიკულები წინა ხელისუფლების დროს, არიან კრიტიკულები ეხლაც", — განაცხადა ბოოკერიამ.

იუსტიციის ყოფილმა მინისტრმა და ქართული ოცნების პარტიული სიის მე-4 ნომერმა, თეა წულუკიანმა განაცხადა, რომ არჩევნებზე დამკვირვებლად დარეგისტრირებული 129 ორგანიზაციიდან 32 პირდაპირ დაკავშირებულია, ან ამა თუ იმ ფორმით აფილირებული ოპოზიციასთან.