დაავადებათა კონტროლის ცენტრის ცხელი ხაზი 116 001
ჯანდაცვის სამინისტროს ცხელი ხაზი 15 05
მთავრობის ცხელი ხაზი 144

დაავადებათა კონტროლის ეროვნული ცენტრის დირექტორის, ამირან გამყრელიძის განცხადებით, კორონავირუსის შემთხვევების 90% მსუბუქია და სახლში მართვას მოითხოვს, საჭიროების შემთხვევაში კი, ექიმთან გასინჯვის პირობები ქვეყანაში არსებობს.

"საბედნიეროდ, შემთხვევების თითქმის 90% არის მსუბუქი, რომელიც მოითხოვს სახლის პირობებში მართვას. რა თქმა უნდა, სასურველია იზოლირებულად, რომ ოჯახის წევრებს არ გადავდოთ, თუ ამის საშუალება არის. თუ არ არის ამის საშუალება, მაშინ სახელმწიფო სთავაზობს ადამიანებს, რომ ისინი გადავიდნენ ე.წ. კოვიდსასტუმროებში და იქ იმართონ უკვე ოჯახისგან იზოლირებულად, რათა არ გავრცელდეს", — განაცხადა მან მთავრობის ადმინისტრაციაში გამართული შეხვედრის შემგდეგ.

გამყრელიძემ კიდევ ერთხელ გაიმეორა, რომ ყოველდღიურად უფრო მეტი ახალი შემთხვევა იქნება, მაგრამ მთავარია, სიტუაცია იყოს მართვადი.

"ჩვენ, ვთქვათ, გრიპის დროს ხომ გვაქვს ბევრი შემთხვევა, მაგრამ სიტუაციას ვმართავთ, დაახლოებით ასე იქნება თანდათანობით კოვიდთან მიმართებაშიც. შემთხვევების ზრდა გვექნება", — აღნიშნა მან.

მისივე თქმით, პიკი, დიდი ალბათობით, იქნება ნოემბრის შუა რიცხვებში და ამისთვის უნდა იყოს მზადყოფნა არა მხოლოდ საზოგადოებრივი ჯანდაცვის, სამედიცინო სექტორის, პირველადი ჯანდაცვისა და ჰოსპიტალური სექტორის, არამედ უშუალოდ მოქალაქეების.

"მთავარია 5 რეკომენდაციის დაცვა — პირბადე, დისტანცია, ხელების ხშირი დაბანა, თავის არიდება დიდი თავშეყრებისგან, ნებისმიერი მიზეზით. დავიმახსოვროთ, რომ 1 წელი, მინიმუმ, ჩვენ თავი უნდა შევიკავოთ ამისგან, რადგან ყველა ეპიდაფეთქების კერა, რაც დღეს ქვეყანაში გვაქვს, საწყისს იღებს ამ დიდი თავშეყრებისგან და შესაბამისად, ვეცადოთ, დიდწილად ვიყოთ ჰაერზე და ყველა შეკრება, ვთქვათ, 5-6 ადამიანის თუ ასე შემდეგ, გავაკეთოთ გარეთ", — განაცხადა ამირან გამყრელიძემ.

დღეს საქართველოში კორონავირუსის 1 941 ახალი შემთხვევა გამოვლინდა. გარდა ამისა, ქვეყანაში კიდევ 10 ადამიანი გარდაიცვალა, ხოლო 412 გამოჯანმრთელდა.

პანდემიის დაწყების დღიდან ქვეყანაში კორონავირუსის 26 503 შემთხვევა დაფიქსირდა, მათ შორის მათ შორის 10 163 გამოჯანმრთელდა, ხოლო 193 გარდაიცვალა. ამ დროისთვის, კარანტინის რეჟიმში იმყოფება 4 180, სტაციონარში მეთვალყურეობის ქვეშ — 3 571, ხოლო კოვიდ სასტუმროებში — 1 848

წაიკითხეთ NCDC-სა და WHO-ს რეკომენდაციები კორონავირუსის პრევენციაზე: